CBSE Class 12 results sangdongogo Raksha Gopal-i mezüngbuba jenjang angu

New Delhi, May 28 (Agencies): Central Board of Secondary Education (CBSE)-i Deobarnü Senior Secondary Examination (Class 12) indang tatidang result sangdongogo.
Noida nung aliba Amity International School nungi Raksha Gopal-i 99.6% nguteta mezüngbuba jenjang takok angu.
Tanabuba jenjang nung DAV Public School, Chandigarh nungi Bhumi Sawant De (99.4%) aser tasembuba jenjang nung Bhawan Vidyalaya Chandigarh nungi Aditya Jai o Bhawans Vidya Mandir, Chandigarh nungi Mannat Luthra nati 99.2% kasasa angu.
Taküm kaketshir lakh 11 shi kati CBSE Class 12 tatidang agütsü aser parnok rongnung shilem 82-i takok nguogo.
CBSE Class 12 tatidang atema school 10,678 nungi kaketshir ajak agi 10,98,891 liasü. Kaketshirtem rongnung tebur 6,38,865 aser tetsür 4,60,026 liasü.
CBSE indang Marks Moderation Policy atema ashishitep ken o ka adokba agi result menur ang sangdongogo. Kaketshirtemi cbseresults.nic.in. nung result tejangja angutsü.
Union HRD Minister Prakash Javadekar-i stream asem- Science, Commerce aser Humanities nungi tematiba jenjang takok angurtem den jembi.
“Takok tajung anguba kaketshirtem ajak nem tenüngang agütsür. Takok mengutetertem danga ano meranga züngang ta ni ayongzüker. Nenokia takok angutsü” ta Javadekar-i metetdaktsü.
Mezüngbuba jenjang takok angur Raksha ya Humanities kaketshir ka lir aser lai osangbener den sensaksemdang, “Ni kanga pelar aser takok tulu anguba atema mamangteter. Ni tatidang nung junga züluogo ta meteta dang liasü saka yamai tematiba jenjang takok angutsübo meimla” ta ashi.
“Iba ya ajanga Humanities azüngertemi mark tajung menguteter ta asüba tangatetba agientsür” ta Raksha-isa metetdaktsü aser lai Political Science (Hons) züngnür ta shisem.