CBSE paper leak asüba ken o nung nisung asem puogo

New Delhi, Metsüremi 31 (Agencies): CBSE paper leak asüba ken o dak sendakba nung nisung asem puogo aser asüngdangyatsü atema nisung teku sota lir, ta tanü Jharkhand police-i metetdaktsü.
Tang pua alirtemji coaching institute, Study Vision nungi lir, ta osang angazüker.
Chatra, Jharkhand nung Superintendent of Police-i, “IPC ozüngtem kübok nisung asem puogo. Parnok rongnung nisung tekubo Juvenile Act kübok apu. SIT-i maneni bushisüngdangdar,” ta metetdaktsü.
Central Board of Secondary Education (CBSE) regional Director-i ken o agutsüba nung ajemdaker, CBSE paper leak asüba ken o nung Delhi Police-i ken o ana züluoka liasü. Economics paper leak asüba ken o Metsüremi 27, 2018 nü züluok aser Mathematics paper leak asüba ken o Metsüremi 28, 2018 nü züluok.
Iba ken o bushisüngdangtsü atema Special Investigation Team ka tentetogo, aser iba team nung deputy commissioners of police ana, assistant commissioners pezü aser inspectors pongu dena lir.
Iba ken o dak sendakba nung police-i nisung 60 dak tema dang asüngdangyaogo, aser parnok rongnung WhatsApp group balala nung administrators 10 densema lir.
Delhi Police Crime Branch-i examination centres, superintendents aser paper ayuba banks tem dang nungia osang meshiogo.
Ano külen Congress party-i, CBSE paper leak asüba ken o nung aibelener tongti rongnung ABVP district coordinator, Satish Pandey densema lir ta aitsüogo.
Congress-i twitter ajanga, “ABVP indang teinyaktsü mapa ajak agi kaketshirtem taküm den asayatsü süra sorkari iba tentet shibangtsütsüla,” ta ashi.