CBSE school tem dang, kaket, uniform mayoktsü court-i tuyu

New Delhi, May 02 (Agencies): Mongolbarnü Delhi High Court-i Central Board of Secondary Education (CBSE) dang, parnok den affiliate süa aliba school tem nung kaket aser uniform ayokba densema shishilembaba mapa meinyaktsü tuyuogo.
Acting Chief Justice Gita Mittal aser Justice Anu Malhotra nati akümba bench-isa, iba dak sendakba nung tawa CBSE-i sangdong ka agütsüogo, ta metetdaktsü.
“Iba tetuyubaji shitak inyaktsü atema onoki CBSE nem metetdaktsür,” ta bench-isa ashi.
Lokti atema inyaker, Sunil Pokhriyal-i temepishiba shidi ka nung, yangi aliba school temi parnok building nung kaket aser uniform ama shishilembaba mapa nokdangtsüla ta temepishiba ka benokba court-i angadanga liasü.
Ajisüaka iba temepishibaji anema CBSE densema ketdangsertemi, “Iba temepishibaji nüburtem taginüba masü. Iba temepishibaji pa sasep nung lir,” ta ashi.
Ajisüaka court-i, “iba ya nüburtem taginüba, talisa school-i aoer tanurtem aser parnok tsüraburtem taginüba lir,” ta ashi.
April 19, 2017 nü CBSE-i temetetdaktsüba ka nung parnok den affiliate süa aliba school tem dang, shisaliok rijutemi shishilembaba mapa meinyaktsüla, kaket, uniforms aser stationery ayokbaji ozüng alema, ta metetdakja liasü.
March 3 nü agütsüba temepishiba nungji court dang, 2011 küm February 21 nü CBSE-i tuyubaji mapa küma inyaktsüla, ta shia lir.
Temepishiba shidi nungjisa, tsüraburtemi shishilembaba tesemtem nung jenjang dalangtiba agi kaket aser uniform alitsü atema parnok nem CBSE-i temelaba agütsüogo, saka school temi ibaji memelar, ta metetdakja liasü.
Shidi nungjisa, school telung nung aliba dokantem nung school ketdangsertem den tesendaktep aliba nisungtemi shishilembaba mapa ajanga tajangzük jenti angur, ta shia lir.
“Shishilembaba tesemtem nung sen 500-i alizükba tsüngsemji school store tem nungbo sen 1,200 nungi 1,500 tsüngda agi ayoker,” ta shidi nungjisa metetdakja liasü.