CCD ngutetsang bushitsü asoshi Coast Guard-i rong ka yokogo

New Delhi, Chiteni/July 30 (Agencies): Indian Coast Guard-i Mongolbarnü ashiba agi, parnoki Mangalore port tejenba nung Café Coffee Day ngutetsang V G Siddhartha bushitsü atema rong ka yokogo.
Coast Guard-isa, diving team asem tashi anioka inyakdaktsüdar.
Taoba Karnataka chief minister S M Krishna’er jala kinungbo Siddhartha, ya Hombar aonung Bengaluru toktsür aoba sülen tang tashi menguteti lir, ta police sangdong ka ajanga metetdaktsü.
ICGS Rajdoot nem Mangalore Port tejenba meita aotsü asoshi nongloktsüogo aser kasa mapang nung ICGS Savitribai Phule standby nung yua lir.
“Air Cushion Vehicle (H-198)-i Nethrvathi ayong nung tasümang bushiba den CG diving team nem teyari agütsüdar. Diving team asem den district disaster relief team-i samar alisang ya bushia arudar,” ta Coast Guard sangdong ka ajanga metetdaktsüogo.
Siddhartha ya Sakaleshpur, Karnataka-i oya liasü saka lentom nung pai gari anisang dang Mangaluru leni aotsü asoshi ashi, ta police temi metetdaktsü.
Dakshina Kannada district kübok Kotepura tesem nung Netravati ayong nung apu atongba sülen pa gari nungi alu aser gari anisang dang pa khen jajaa senzütsü ta ashi. Iba sülen gari anisangi police den tongtepratepa liasü.