CCNTHCO-i party balala dang pelar

Kohima, Aenjeti (January) 27 (TYO): Yimtenren party balala aser Core Committee of Nagaland Tribal Hohos & Civil Organisations (CCNTHCO) tsüngda senden aika amendang, nüburtemi “Election magidang Naga yimtenren onük latettsü” taginüba pusemba atema CCNTHCO-i yimtenren party tem- NPF, BJP, Congress, NPP, NDPP, NCP, Nagaland Congress, JD (U) aser AAP dang pelar, anungji tongmelang agi- nüburtem taginüba ola angaa yimtenren party temi election nung tokteptsü atema tenüng magütsütsü, ta tanü CCNTHCO Secretary, Joel Naga aser CCNTHCO Convenor, Theja Therieh nati sangdong ka ajanga metetdaktsü.
“Tang state Assembly election agira tang tejembidak ken o nung timtem alitsü ta CCNTHCO-i meteta lir. Anungji küm aika yongaa aliba sülen kobi melii yimtenren onük latettsü imlaa aliba mapang ka nung yimtenren onük latettsü aliba raksatsüsa election memelatsüla,” ta sangdong nungsa shia lir.
CCNTHCO-isa Aenjeti (January) 29, 2018 anüngdang 11:00 ako nungi Hotel Japfu, Kohima nung National aser Regional yimtenren party tem aser Negotiating Teams (NSCN(IM) & NNPGs Working Committee den “Solution before Election” onük nung külem senden ka ayonger, anungji ajak dang iba senden nung medema adentsü mepishia metetdaktsür, ta CCNTHCO-isa metetdaktsüogo.