CCOFA-i akhangba ama inyaktsüla: DDCF

Dimapur, October 7 (TYO) : Coordination Committee on Fuel Adulteration (CCOFA)-i aginüba ama totzü meyoktepba inyakyim bushisüngdangtsü atema CBI nem agütsütsü akhanger, ta Dimapur District Citizens Forum (DDCF)-i sangdong ka nung metetdaktsü.
Non-Governmental Organization kati iba ama tongtipang onük jungkai adoka metetdaktsüba atema sorkari aaka bilemtsüla aser tongtipang onük ta angateta tekaratiba nung bangdakpur nem agütsütsüla, ta DDCF president, N Joseph Lemtur-i sangdong nung shia lir.
Iba dak sendakba nung totzü ayokdak kiburtema ozüng kasa kübok tai tongloktsütsü tim kechiyong parnoki ozüng alema mapa inyaktsü atema totzü ayokdak sublet/leased asü, ta DDCF-isa metetdaktsü.
Nagaland nung alir ajak ajungtsü atema ACAUT Nagaland-i anibelem arema ozüng alema totzü meyoktepba maparen jungkai adokdaktsü anungji parnok dang kanga pelatsü tim. September 10, 2016 nü public-i iba onük asoshi telemtetba agiba nung DDCF-ia pusema nungiter aser CBI nem magütsüra CcoFA-i lungkak aitba nung adentsü, ta sangdong nungsa shia lir.