CCoFA-i sorkar aitsür; Nübortemi nungita yaritsü ayonger

Dimapur, October 17 (TYO) : CCoFA-i ayongzükba lungkak aitba sentong ya ozüngi memelaba sentong ka ta State Cabinet-i lemtetba atema sasa bilemtsür kechiyong state sorkari ochimashi mapa inyakba anema noktaktsübaji ozüngi temeten agütsür, ta Media Cell, CCoFA-i sangdong ka nung metetdaktsü.
“CBI nem bushisüngdang südakjang ta takhangba agütsübaji ozüng alema inyakba mapa ka ta sorkari bilemer asü? Iba asoshi timi lungkak aitbaji ozüngi memelaba sentong ka ta koba Act ajanga ashir?” ta CCoFA-isa sorkar dang asüngdang.
Cabinet-i ozüngi memelaba lungkak aitba sentong ka ta sangoktsüaka, tanü Nagaland Chief minister den par Cabinet züngsemtemi New Field Check madeni Assam-i miima alu. Iba ya ajanga sorkari aibelena inyakba aser teinyaktsü tim meinyakba jungkai adoka sayur, ta CCoFA-isa ashi.
Iba sülen CM’er telok kecha timtem melii dang state telungi aitdaktsü, saka New Field Check Gate adentsü atema dang süaka, CM-i armed policeman noklang aika pa süitsü asoshi mapa lemzüktsü, ta parnokisa ashi.
CCoFA-i timi dang lungkak aittsü ta tetuyuba agütsüba ama tadenertem ajaki shilem agi saka Dimapur police-i gari anena alibatem raksatsü aser YAN volunteers dak teka sangshi. State sorkari meimchir temeten anema aser tebilemba sayutsü asoshi inyakba mapa nung tashiyim amshiba ya Nagaland Angh-i süoki ia agitsü mepishir, ta CCoFA sangdong nungsa metetdaktsü.
State sorkari tashiyim amshia songtemtsü merangba inyakyim ya tangatetba shitak alirtem ajaki aitsütsü atema mepishir aser iba sentong pusema nungiter ta sayutsü atema asüngnep 6:00 ako nungi Chumukedima Patkai Bridge nung adenshitsü ayongzüker, ta CCoFA-sa ashi.
Police-i tashiyim mapa inyakra, taruba lungkak aitba shilem nungbo gari ajak nokdangtsü aser iba mapang jibo timi magitettsü ama bilemer, ta parnokisa shisem.