CCoFA teloki Oct. 17 nü NH nung govt. gari mesenzüdaktsütsü

Dimapur, Oct.09 (TYO) : Nagaland nung gari totzü ayokertemi totzü nung kerosene meyokteper ayokba ochimashi aser tekülak mapa tamajung inyakba maparen CBI nem bushidaktsütsüla ta ACAUT teloki anir lokti tentet 21 agi akümba “Co-ordination Committee on Fuel Adulteration (CCoFA)” teloki akangba state government-i mataloktsü nungji, lemteta akaba ama National Highways mokdangtsü ta tanü parnok sangdong ka ajanga metetdaktsüogo.
Nagaland nung lokti tentet (civil society) 21 telongjem ya October 08, 2016 nü senden ka mena iba telemtetba agia liasü. Iba senden nung parnoki September 10, 2016 nü nübortem den senden ka alidang, gari totzü nung kerosene meyokteper ayokba maparen ya bushisüngdangtsü asoshi anogo 15 tsüngda CBI nem agütsütsüla ta takangba ka state government nem agütsütsü lemtet aser lemtetba ama agütsü saka government-i meinyaktsü.
Ibayongji, anogo lateta yutsüba mapangji süiba agi, National Highways mokdangtsü asoshi sentong balala ayongzüktsü aser mezüngbuba nung National Highway 29 (AH-1) nung gari totzü abenba gari aser government garitem mesenzüdaktsüi nokdangtsü telemtetba agiogo.
Iba mezüng sentong nung item garitem dakji alaka tanga garitembo menokdangi senzüdaktsütsü aser iba government gari nokdangba sentong ya mapa küma inyaktsü asoshi lenjem ajak nung nisung toktsütsü ta CCoFA telokisa metetdaktsü.
Iba tashi nungjia state government-i nübortemi aginüba meinyaktsüra, mezüng longkak aitba sentong dang nungi tesashiba apusotsü ta parnokisa metetdaktsü.
Lateta yutsüba mapabo süiogo saka tang tsümar benjong mapang asüba agi longkak aitba sentong ya 17th October, 2016 nü nungi dang tenzüktsü ta parnokisa metetdaktsü.
Tang gari totzü tamajung ayokba mapa putetba yagi talisa Manipur nung alirtemang tuluba ajangzüktsü, kechiyong Nagaland nung meyoktepba totzü ya teimbaka Manipur leni bener aor, anungji iba longkak aitba mapang nunga Manipur nung alirtemia dena angateta aremzüka atatsü mepishir ta parnokisa mepishia metetdaktsüogo.