CCOTOA-i Karbi nunger dak mang mayangtsü asoshi mepeshi

Guwahati, Aami (June) 12 (Agencies): Coordination Committee of the Tribal Organisations of Assam (CCOTOA) puri Tentonü nüburtem dang Dokmoka nung Guwahati, nungi asangur ana; Nilotpal Das aser Abhijit Nath na züksetba dak sendakba nung Karbi Anglong nungi nüburtem dak mang ayangtsü atem memerangtsü asoshi mepeshi.
CCOTOA lenirtemi iba tatalokba ya nisung shisatsü keter inyakba maparen ka masü, ta shia aitsüogo aser aibelena alirtem nem ajak asoshi tan asütsüsa temerenshi agütsütsü akhang. Parnoki ashiba agi, iba tatalokba sülen nisung kari karbi nunger mapa inyaker aser kaketshirtem districts balala nung alir talisa Nagaon, Dibrugarh, Kamrup (metro) aser Jorhat alirtem dak mang ayangtsü asoshi meranger.
“Iba tatalokba ya karbi nunger ajak dak matongtsüla. Iba tatalokba ya tim masü aser kanga tia maka tatalokba ka lir, ajisüaka Karbi nunger ajak dak mang ayangtsü bilemba ya kasa dang tamashi asütsü. Iba ajanga lokti tali mesüngjemi akümtsü. Onoki ajak dang azüzüktepa inyaktsü asoshi akhanger,” ta CCOTOA, chief convenor Aditya Khakhlari-i ashi.
“Amungnü nisung kari Jorhat Medical College & Hospital nung inyaker Karbi nunger kar amokmeren aser iba ajanga parnok district toktsür aotsüsa aküm. Maneni Karbi nunger kaketshir aser mapa inyakertem aika dang parnok talidak ki toktsür aotsü asoshi ashiba osang angazükogo. Parnok bus nung dena amentsü asoshi memela,” ta Khakhlari-i ashi.
CCOTOA züngsemtemi ashiba agi, social media nung Karbi aser Bodo nunger anema osang aika prokdar. “Lanurtem social media amshiba yimya ngua onok kanga shibulur. Iba amala osang prokshiba nokdangtsü asoshi state sorkari takaratiba nung jenjang tapet agitsüla. Onoki nüburtem dang iba tatalokba ya kin ka dak madongtsü asoshi mepeshir,” ta CCOTOA, coordinator, Pramod Boro-i ashi.
Iba lokti ajangasa ashiba agi, iba ya atalokdang police ana den liasü. Parnoki duty shidak minyakba atema tena ya merenshitsü asoshi akhang.
Indigenous Tribal Sahitya Sabhas, Assam puria iba tatalokba ya aitsüogo aser aibelena alirtem nem tapet temerenshi agütsütsü asoshi akhang. Parnokisa nüburtem dang azüzüktepa inyaksangshitsü asoshi mepeshi.