Ceasefire onük nung India-i Pak high commissioner jaok

New Delhi, August 16 (Agencies): Delhi nung Deobar nü India-i Pakistan high commissioner, Abdul Basit jaoka tawa LoC nung Pakistan sepaitemi tantsür ka densema nisung trok tepsetba asoshi aija jembiogo.
Pakistan ketdangser Basit ji External affairs ministry secretary (east) Anil Wadhwa-i jaok, aser tawa arrtsülen tatalokbatem indang pa nem metetdakja liasü.
Iba senden tembangba sülen osangbenertem den jembidang Basit-i, ceasefire temzüng alemaji shirnoki inyaker’ar ibaji jangjatsü asoshi mera takhangba ka agitsü nüngdaker, ta ashi.
Basit-i, “July aser August ita na nung ceasefire temzüng alema inyakbatem asoshi onok tebilemtsü akar, LoC nung iba tsütsülen nungi ceasefire alema 70 ben jungnüa inyakogo. Iba asoshi onoki süoki ia tebilemtsü akar,” ta ashi.
“Temzüng alema maneni injang yokbaji shirnoki’ar jangjatsü aosshi mera takhang ka onoki aginer,” ta pai ashi.
Honibar nungi tenzüka India post tem aser nübur aliba tesemtem nung Pakistan sepaitemi bomb pokdaktsüba den mortar aser injang yokba ajanga tajemba agi nisung trok tashi süogo.
India nunger Independence Day nü Sarpanch ka densema nübur pongu asü aser nisung pongu yirua liasü aser Deobar nü tantsür ka süogo.
India aser Pakistan naprongla nungi National Security Advisor- Ajit Doval aser Sartaj Aziz na kiralongraba onük dak sentakba nung tang mezüng August 23 nü New Delhi nung senden ka amentsü sentong lir.
Pakistan Ato kilonser Nawaz Sharif atema National Security & Foreign Affairs (NSA) Advisor, Sartaj Aziz-i India semdanga India NSA advisor, Ajit Doval den NSA-level senden amentsü, ta Pakistan-i Brihostibar nü osang jangjaja liasü.
Ketdangsertemi ashiba agi, Sharif Belarus linük nungi meyipa aruba sülen pai iba telemtetbaji agizüka liasü.
Yaküm New Delhi nung Pakistan ketdangseri Kashmiri Separitist lenirtem ajuruba ajanga August ita nung India-i Pakistan linük den High level senden ya thinenja liasü.
Russia, Ufa nung Pakistan aser India Ato kilonser na senden amenba mapang iba senden amentsü atema bangjemtepa liasü.