CEC taruba hopta Assam-i oa election atema inyakyim reprangdangtsü

New Delhi, December 15 (Agencies): Chief Election Commissioner-i taruba hopta Assam semdangtsü aser iba mapang pai aruya aliba election atema inyakyimtem reprangdangtsü. Assam nung Assembly election sangküm March-April mapang agitsü sentong lir.
CEC Nasim Zaidi den Election Commissioner Achal Kumar Joti aser Om Prakash Rawat nungera dena December 21 nung 22 nü tashi Assam sema jajatsü.
Parnoki iba mapang state nung poll ketdangser taintem den Guwahati nung ajuruteptsü aser electoral roll renema aliba reprangdangtsü. Iba den külemi party balala den senden amentsü aser sorkar mapa nung inyaker taintem den police ketdangsertem dena sangküm agitsü aliba Assembly election inyakyim jembitsü atema senden amentsü.
Assam Assembly nung züngsem 126 lir aser tang Chief Minister Tarun Gogoi-i aniba telok-i state nung yimsü tesüdak lir.