CECS, Dimapur-i PHC Kangtsüng nem ambulance agütsü

July 03, 2017 nü Mokokchung district kübok Kangtsüng yimdak CECS Director, Subonenba Longkumer-i Kangtsüng PHC nung Ambulance service tenzüktsüba noksa nung angur. 

Kangtsüng (Mokokchung), July 03 (TYO): Hombarnü Mokokchung district kübok Kangtsüng yimdak CECS Director, Subonenba Longkumer tongti-i PHC Kangtsüng nung Ambulance service tenzütsüogo, aser kasa sentong nung Tuli SMO, Dr. Imlinaro, aser Kangtsüng Village Council züngsemtem liasü.
PHC Kangtsüng nem Ambulance agütsüba ya The Hans Foundation-i nungitba project, Mobile Medical Unit (MMU) dak sendakba ka lir.
Iba sentong nung Kangtsüng village council Chairman, M Mar Lemtur-i, tamasabo yimdak dispensary dang liasü, ajisüaka tangbo tesem nung PHC aliba ya maongka ka lir, ta pelaba metetdaktsü.
Ajisüaka sensotem atema yangji aliba facilities ji teperi masü liasü, saka Community Educational Centre Society (CECS)-i nungita yariba ajanga jenjang tajungba kümogo, ta chairman-isa metetdaktsü.
CECS-i yimer nem Ambulance ka agütsüba ya nüburtem atema temoatsü tulu ka lir, ta Mar Lemtur-isa metetdaktsü.
Kasa sentong nung CHC Tuli SMO, Dr.Imlinaro-ia jembia liasü, aser lai tesasaba olen ka nung, sorkar metokmeperi aser iba tesem nung nüburtem nem ambulance ka agütsütsü atema meinyakatetba ajanga timtem ajurua liasü, ajisüaka Medical Project ka ajanga Subonenba Longkumer-i ketdangsüa nüburtem atema inyaktsüba atema pelar, ta metetdaktsü.
Subonenba Longkumer-ia nüburtem dang iba ambulance ji pei indang ama kanga apayua amshitsü aser shirangertem junga tenzüktsü atema kanga anepalua amshitsü mepishi.
Paisa, iba ambulance ya Kangtsüng nung alirtem dang masü saka kishikina yimtem nung alirtema nüngdak nung amshitsü metetdaktsü.
Paisa, iba gari ya nija tajangzük mesüra nija nüngdak atema mamshitsüla saka shirangertem rongdak nüngdak atema dang amshitsüla, ta metetdaktsü.
Director, Subonenba Longkumer-isa iba gari anir ka den iba gari küm ka atema sponsor asütsü, aser ibaji mapang shia reprangshitsü, ta metetdaktsüba den külemi iba ambulance service indang osang mapang shia metetdaktsütsü shisem.
Village Health Committee (VHC) Chairman, I Nungkum Pongen-i tepela anküp o jembi aser MMU, CECS, Coordinator, Limawapang-i sarasadema iba sentong tembanga liasü.