Celine Dion-i 2016 Billboard Icon Award agizüktsü

London, May 13 (Agencies): ‘My Heart Will Go On’ ken atenla, Celine Dion-i May 22, 2016 nü Billboard Icon Award agizüktsü. Billboard Icon Award agizüker rongnung la pongububa asütsü.
2016 Billboard Music Awards (BMAs) sentong nung Celine Dion-i Queen teloki atenba ken, ‘The Show Must Go On’ atentsü, ta Female First osang ajanga ashi.
Arishi küm 48 kentener, Celine-i küm 36 tashi ken tena arudang la mapa tajung ajiteta taruba Billboard award sentong nung la nem Icon award agütsütsü. Iba sempet ya tamalen Neil Diamond, Stevie Wonder, asür Prince aser Jennifer Lopez nungeri agizüka liasü. Dion kinungbu Rene Angelil aser adianu Daniel naprong taküm küm tetenzüklen cancer ajanga asü.
Las Vegas, T-Mobile Arena nung ayongzükba 2016 Billboard Music Awards (BMAs) sentong nung atentsü atema Celine Dion-i Queen teloki atenba ken shimogo aser BMA Executive Producer, Mark Bracco-i iba kenji tetemsü ta shiogo.
“Celine Dion-i ken tajung aika tenogo aser Billboard Music Awards sentong nung Icon performance atema lai lasasa ‘The Show Must Go On’ ken shim. Tang iba mapang nung la taküm nung iba kenji tetezü aika aketer südi, aser ken kanga junga shimogo,” ta Bracco-i ashi.
Celine Dion-i Billboard awards 10 aser Grammy award 5 densem,a sempet aika agizükogo, aser maneni lai ano Billboard award agizüktsü.
May 22 aonung 8:00 ako nungi tenzüka agitsü aliba award sentong ya rap kentener, Ludacris aser R&B star, Ciara nati ketdangsüa agitsü.