January 31, 2016: Nüngtugu kentener Celine Dion kinüngbu René Angélil tan ita tetenzüklen asüba sülen la sapurtemi lar kibong nungtita yariba atema Celine-i la sapurtem dang pelaba lemsatepogo.
Celine kinüngbu Angélil mapang talangka cancer tashitak den raraa aruba sülen taküm January 14, 2016 nü alima nungi pilaogo.
Music manager Rene indang asüpila sentong January 22 nü Montreal, Notre-Dame Basilica nung alidang tena sapur nisung merirjang aika adenshia asür nem akhüm agütsü. Dion küm 12 asüba mapang nungi René-i Dion kentenba maparen ajak achaayanga liasü.
Dion-i la indang website ajanga, “Tesüiba anogo ishika nisung aikati onok dang temeim sayuba aser nungitba ajanga ozü kibong kanga kongshiogo. Nenoki René meima bilemba onoki jangjaogo, iba den külemi nenok sarasadem aser taochi ajanga onok melung süngzükogo. Kü melungjang taroktiba nungi ni nenok dang pelar,” ta ashi.
Laisa, “Rene atema National Funeral agütsüba asoshi ni Quebec sorkar dang kanga pelar, iba den külemi pa nem akhüm agütsütsü atema arur kija aser tentet balala danga pelar,” ta ashi.
“Nenoki onok dang taochi sayubaji onoki kodanga mamatettsü. Ozü kibong tenüng nung, Céline, René-Charles, Nelson & Eddy,” ta laisa ashi.
Angélil January 14 nü arishi küm 73 nung asü. Celine kinüngbu asüba sülen anogo ana dang lir Celine tedi tambusang, Daniel-a cancer tashitak ajanga süogo.
You must be logged in to post a comment Login