Cellphone tali amshiba ajanga tesendaktep raksatsür

Washington, September 30 (Agencies): Nisungeri cellphone tali amshiba ajanga tesendaktep raksatsüba den külemi, item nisungtemi oda mepelateti akümba osang ka US kübok Baylor University nung research agirtemi bushitetogo.
Baylor University kübok tentetba Hankamer School of Business research agirtemi par US nung alir nisung 453 tashi anidener bushisüngdang sentong ana tashi agiba sülen iba osang ya bushitet.
‘Phubbing’ mesüra ‘Partner phone snubbing’ ta ajaba nisung kati cellphone tali temulung agüja amshinüdang pa mesüra la den alir sendoka toktsüba ajanga nisung ana tsüngda tesendaktep mejungi kümdaktsür ta parnoki metetdaktsü.
“Tan bushisüngdang agiba sülen ‘phubbed’ asüba ajanga nisunger tesendaktep mejungi akümba kuli bushitetogo,” ta Marketing professor, James A Roberts-i metetdaktsü.
Tan agiba bushisüngdang sentong nung shilem agir noklang nung shilem 46.3-i tangar phubbed asüba aser yamaji inyakba ajanga tesendaktep mejungi kümdaktsür ta shilem 22.6-i par tebilemba lemsatepa liasü.
Ano, “Parnok shilem 36.6-i jashitsüsa tatalokba kecha majuruaka, oda mepelateti aliba osang lemsatep,” ta Roberts-i ashi.