Census 2021 nung OBCs indang data bendentsü

New Delhi, Luroi (August) 31 (Agencies): Census 2021 nung tang mezüng atema Other Backwards Castes (OBC) indang data bendentsü ta Home Ministry-i Hokolbarnü metetdaktsü.
Taoba mapang küm 7 nungi 8 agiba tashi agia Census mapa renemba ama masü saka Census 2021 ji küm asem nung renemtsü, ta home ministry otongdar kati ashi.
“Tang mezüng atema OBCs indang data bendentsü” ta paisa ashi.
Union Home Minister Rajnath Singh-i Census 2021 atema mapa inyakba meyipa reprangshiba sülen iba osang metetdaktsüogo.
Tang ya küm tenet nungi ti tsüngda nungang data renemteter. Census 2021 atema enumerators lakh 25 dak tema training agiogo aser osang tejangja bendentsü ta ketdangser kati ashi.
House listing mapang maps aser geo-referencing amshitsü atema sentong renemdar ta paisa ashi.
Ministry of Statistics and Programme Implementation nung kongsang ka National Sample Survey Organisation (NSSO)-i 2006 nung linük nütsüng yongsük sample survey report ka metetdakja liasü. Iba nung parnoki linük nung OBC nütsüng yongsükji noklang shilem nung 41% shi asütsü ta shia lir.
2019 Lok Sabha elections atema nüboyimdang Bhartiya Janata Party (BJP)-i 2021 census nung OBC data indang telemtetba agiba osang kanga tongti süa jembitsü imlar.