Center nungi yokba sen tulurtemi chiadoker: ACAUT

Dimapur, March 02 (TYO) : 2015-16 government küm nung Center government-i Centrally Sponsored Schemes (CSS) asoshi sen crore 1353.52 agütsüogo ta ACAUT teloki metetdaktsü.
CSS mapatem inyaktsü asoshi state-i mapa shia sen 10% enoktsütsüsa akümer aser item CSS mapatem asoshi yokba sen to tangutsü purtem account mesüra parnok keti indangindanga tonga aotsü masü saka state government-i dang agizüka lemtsütsü asüba agi state government-i agütsütsüba shilem 10 % jibo agütsür CSS 142 indang sen agizükogo ta ACAUT teloki state government nung yimsüsür aser ketdangsertem mapa dak temulung melemi metetdaktsü.
Item CSS ajanga aruba sen ajakji mapa shitak inyaktsüba masü saka yimsüsür aser ketdangser tulurtem lemsaa agitsü asoshi dang lir ta ACAUT telokisa kanga jashia metetdaktsü. Talisa, SSA, RMSA aser Hindi tesayurtem nem ita tuku ita sen magütsüba osang angashi dang temulung kanga shiranger, ajisüaka department-i state government-i state shilem 10 % magütsüba ajanga center nungia meyoker ta tatemtsü osang aika ashir ta parnokisa metetdaktsü.
ACAUT telokisa tawa sangdong ka nung state government ket nung SSA, RMSA aser Hindi tesayurtem nem ita sen agütsütsübo peria dang lir kechiyong 14th Finance Commission-i 2015-17 küm Finance department nem sen crore 5229.56 agütsüogo aser SSA, RMSA aser Hindi tesayurtem nem agütsütsüba ita senji crore 3 shi dang asütsü ta metetdakja lir. Ajisüaka, ita sentemjia magütsür asünungji, item sentemji kong kechi atema endok, ibaji tejangja nübortem dang Finance Commisioner-i ashitsüla ta NTAC ajanga takangba ka agütsüogo.