Central Jail, Dimapur nung kaketnang ka semzük

Dimapur, October 23 (TYO): Sarvahitey-i K.A.L. Group (Dimapur nung aliba law firm) aser NGO- Sophia Foundation den senteper Project Paper Bridge kübok Nagaland nung kaketnang (library) lapoktsür; ajioda Bodhbarnü parnoki Central Jail, Dimapur nunga kaketnang ka semzüktsüogo, ta Project Coordinator, Access to Justice Nagaland, Lima Longkumer-i sangdong ka ajanga metetdaktsü.
Central Jail nung kaketnang tila kabo liasü aser tanü kaket 600 bendenloksemogo; item kaket ajak ya India tesem balala aser bendang linüktem nungi bendenba liasü.
Michigan, USA nungi arula Heather Lynn-i kaket aika bener arua agütsüogo.
Sarvahitey NGO co-founder, Prem Prakash-i ashiba agi, iba kaketnang semzükba tongti nükjidongji tepoukdak alirtem ‘R’ asem- ‘Reformation, Rehabilitation aser Reintegration’ atema lir.
Project Paper Bridge-i Nagaland nung aliba tepoukdak ana- Dimapur District Jail aser Mon District Jail nunga kaketnang ana anepaludar.
Sophia Foundation nungi Alemla-i Nagaland nung iba mapa apiteta inyaker, aser kasa sentong nung lai Dimapur District Jail nung recital sessions agiba indang lemsatepa liasü.
Lai kasa sentongji Central Jail, Dimapur nunga inyaktsü tebilemba lir, ajioda tepuokdak alirtemia iba atema jangrar.
KAL Group nungi Esther K Aye-i laptop aser projector amshia tepoukdak alirtem dang film sayutsü benoka liasü, aser ibaji jail ketdangsertemi agizüktsüa akok.
Central Jail, Dimapur Jailor, Dr. Oben-i lokti pelaa agizükba o jembi aser Senior Jailor, central Jail, Dimapur, Buming Khiam-i okila jembia liasü. Kaketnang semzükba sentong ya Lashika Aye, Associate of K.A.L Group leniba nung agi.
India nung Project Paper Bridge kübok tanü semzükba ya kaketnang 206buba asütsü aser Nagaland nunga 26buba lir.