Central Nagaland Tribes Council (CNTC) state jenjang nung telok ka kümogo

Dimapur, March 12 (TYO) : Honibarnü Town Hall, Dimapur nung kanga dang tongtipang sentong ka agiogo aser ibaji Ao, Sumi aser Lotha kintemi tentetba Central Nagaland Tribes Council (CNTC) state jenjang nung telok ka ta officially tenzükba sentong lir.
CNTC indang nükjidong ‘Unity, Solidarity and Fraternity’ lir aser iba teloki kin asem atema aser ano Naga nunger atema sabang ka ama shilem agitsü.
CNTC indang nükjidongtemji kin asem tsüngda telongjem aser amalitep alitsü; adianu ama tesentaktep ayutsü; kin o yaritepsü; kin asem indang sobaliba wazüka aser kümzüka ayutsü atema lir.
CNTC-isa tanga Naga nunger teloktem den yimjung aser jenjang tajungba nung alitsü inyakba mapa nung amalitepa lia yariteptsü,
Tanü sentong nung Ao Senden tir Imolemba Jamir, Lotha Hoho mendenbuba Mhao Humtsoe aser Sumi Hoho tir Toniho Yeptho nungertemi o tatsütsü jembidang Naga nunger ajak ajungtsü atema kin asem tsüngda katika akhümtsübutepa aser tangatettep nung longjemer mapa inyaktsü tayongzükba agütsü.
Sentong nung CNTC Constitution Drafting Committee Convenor, Supu Jamir-i temzüng zünga metetdaktsü aser ibaji teloki mulunga agizük.
Sentong nungsa Nomination Committee Convener, Mhao Humtsoe-i 2016-18 kümsük atema ketdangpur tasen shimba osang metetdaktsü.
2016 -2018 kümsük atema kin asemprong nungi nisung tugugu shima Executive Council züngsem 27 shim. Parnokji- President: Hokiye Yepthomi, Vice Presidents : Renchio Yanthan & O Shilu Jamir, General Secretary: Imtinochet Ao, Joint Secretaries : Nikheto Jimomi & Nyimshio Mozhui, Finance Secretary: Khondao Ngully, Cultural Secretary: K Bendangtoshi, Info & Publicity Secretary: Jonah Achumi aser executive züngsem 20 lir.
Iba sentong nung mendenji Capt Khekavi Zhimomi liasü aser Imtinochet Kubzar tezülur liasü. DABA Associate Pastor, Rev L Lima Jamir-i temoatsü meshia sarasadem aser Sanepong Tzudir o medemertemi omen ken aten.
Sentong nung CNTC Interim Council, Hokiye Yepthomi-i tesentepertem pela agizük, Discipleship Bible College Choir aser Tiameren Aier nungertem ken tajung aten aser Rev. Dr. Shiwoto Assumi-i mendenpur tasen shimertem asoshi temoatsü meshia sarasadem.