Central Nagaland Tribes Council -i JCC lenir nungiter

Dimapur, Feb.16 (TYO): Nisung kari Joint Co-Ordination Committee (JCC) Convenor, Wb.Subo Jamir tenüngmenüktsütsü asoshi pa aija jembibaji khenyongi tai aser magizüker ta Central Nagaland Tribes Council (CNTC) teloki metetdaktsüogo.
Nagaland nung municipal aser town council election agitsüba dak aketba ken o aser maparentem ya nübortem tonga oagi angatetdakja shisalemsateptsü asoshi NBCC teyari agi government aser JCC na tsüngda January 30 nü ULB election ita ana thitema atatsü asoshi ken o ka renem ta JCC-isa metetdaktsü.
Joint Co-ordination Committee ya tamasa CNTC ajanga tentet aser ano tuluba küma Angami nunger o Chakhesang nunger na aden aser iba sülen Naga Council Dimapur kübok ENPO nung aliba kintema aden. Iba sülen tatalokba aika lir aser nisunga asem tashi süogo. Anungji, tang ULB election dak aketba maparentem nung nübortem longjemer inyakyonga aoba ya nisung kari danga yimten telok kar pusema inyaker amai jembira, ibajibo khenyongi tai aser tamendakdak makaba ken o asütsü ta CNTC-isa metetdaktsü.
JCC nung convener ya yimten telok kar anema telok kar anir asadener masü saka Naga nunger kintem ajak longjemer shimba lenir lir, anungji pai jembibaji Naga kintem ola asütsü ta CNTC-isa metetdaktsü.