Central team kati Kohima nung tsüngsarusa tensa asdanger

Dimapur, April 22, 2022 (TYO): April 22, 2022 nü Inter-Ministerial Central telok kati Kohima district semdangogo aser parnoki District Disaster Management Authority (DDMA) aser line department tem den ajurutepa senden ka amen.

Nagaland nung tsüngsarusa tensa asadangtsü atema parnok aru Nagaland department ketdangsürtem den ajurutepdang ashi.

Centre nungi aruba telokisa Agri aser PHE department dang Kohima district nung tzüngluruwa matongdang action plan ka renemtsü atema mepishia liasü.

Tsüngsarusa tia ajurudang alu nung tsünüsenbongtsü madoktsü aser aluyimertemi rongseketzüng tsütsü takoksa ajurutsü anungji iba mapang aluyimertem yaritsü atema action plan ka renemtsüla ta parnoki ashi.

Inter-Ministerial Central telokisa department dang Kohima jila nung dang masü saka yimdak alirtemi küm piyong tzü peria angutsü atema mapa inyakba nung yariteptsü mepishi.

Parnokisa Department of Animal husbandry dang Nagaland nung tsüngsarusa tensa aser wara adokdang yariteptsü atema renema alitsü metetdaktsü.

DDMA Kohima ketdangsürtemi parnok dang 2021 küm Nagaland nung tsüngsarusa tensa ajuruba aser iba mapang yaritepba osangtem metetdaktsü.

PHED, Urban Division Kohima-i Kohima jila nung tzü peria mengui timtemba nung yaritepba osanga parnok den lemsatep.

DDMA-isa 2020-2021 tsüngda Kohima district nung tsüngsarusa ajanga ali 1465.4 acre nung tsünüsenbongtsü raksa aser iba mapang anüdoklentip tsütsü aliba yimtsüng 65 nung kanga kongshi ta metetdaktsü.

Senden nung Deputy Commissioner & DDMA Chairman, Gregory Thejawelie IAS-ia o jembi aser Agriculture, Fisheries, PHE, RD, Veterinary and Animal Husbandry aser Land Resource department tem nungi ketdangsürtem aden.

Senden amenba sülen Inter-Ministerial Central telok den DDMA ketdangsürtemi Gariphema village, Kohima semdanga liasü.

Centre nungi aruba telok nung Director CWC Sudhir Kumar, Under Secretary Food and PD, Krishi Bhawan, Ram Chandra, Assistant Director aser MNCF/DA, FW, Dr. Pradeep Kumar nungertem dena lir.