Centre aitsütsü asoshi Sonia-i tiyazü jembir: BJP

New Delhi, August 30 (Agencies): Tanü Bihar yimtiba Patna nung Lokti senden tulu ka nung Congress tongti lenir Sonia Gandhi-i BJP-i aniba sorkar aija jembiba sülen BJP-i, BJP sorkar aitsütsü atema “Kibong kati yimsüsüba, maongka bushiba aser ochimashi ajungkettsürtem longjemogo, ta ashiba den külemi Centre aitsütsü asoshi Congress tongti leniri yazü jembir, ta aitsüogo.
MNREGA aser Pakistan den inyakba mapatong onük nung ajemdaker Sonia Gandhi-i Centre sorkar aitsüba dak sentakba nung BJP-i, India-i kiralongraba anema sashia noktakbaji alima ajunga meteta lir, ta ashi.
“Tanü, kibong kati yimsüsüba, maongka bushiba aser ochimashi ajungkettsürtem sabang ka nung longjemogo. Sonia Gandhi, nai terabo aaktsüla. Pakistan onük nung nai yazü jembigo,” ta Union minister aser senior BJP lenirr Ravi Shankar Prasad-i osangbenertem senden ka nung ashi.
BJP sorkar kübok MNREGA nung sen crore 5000 tali tutsüogo, ta paisa ashi.
Sonia Gandhi-i kisetshiruru chiyungtsü ozchimashiba ke o nung tai tonglokja laisang aser RJD tongti lenir Lalu Prasad den sangba ka lemsaba asoshi aija Ravi-i, Bihar nung pai yimsüsüba Sonia-i teüng sanga jembibaji taochi maket asayamenü ka lir, iba ya Bihar mezüngmeshiba ka lir, ta ashi.
“Tanü senden nung terenlok indang onükmaliasü. Senden nung tetsürtem, dalits aser sensakertem maliasü,” ta Union Minister-isa ashi.