Centre asem nung Ao Arangtet Tatidang tenzükogo

Dimapur, Chiteni/July 05 (TYO): Chiteni/July 5 nungi Ao Senden Literature Board (ASLB)-i ayonga centre asem; Dimapur, Mokokchung aser Kohima nung Ao Arangtet Tatidang (Ao proficiency test) tenzükogo.
Dimapur nung Mission Hr. Sec. School, Mokokchung nung Jubilee Memorial School aser Kohima nung Chandmari Hr. Sec School nung agidar. Taküm tatidang agütsür parnok ajak agi 206; Mokokchung nung 140, Dimapur nung 43 aser Kohima nung 23 lir. Centre ajak meyokteper tatidang agütsürtemji tetsür 167 aser tebur 39 lir.
Diploma course balala atema tatidang yamai lemsar agir; ka undergraduate level pur atema AT 1 nungi AT 5 tashi, tanabubaji graduate level pur atema AT (G) 1 nungi AT (G) 3 tashi aser tasembubaji post graduate level atema 601 aser 701. Tatidang balala atema ASLB-i tapet denyim (syllabus) den kaket renema züngdaktsür.
Arangtet Tatidang ya 2006 küm nungi tang tashi metitemi agia arudar aser nisung aika nem Ao oshi nung diploma certificate balala agütsüogo. Iba tatidang ya tongtibangsa Ao oshioben aser kaketkeno rendaktsüba den Ao o zülumen/ozülu lirumedema zülutsü nükla yur ASLB-i mapang shia iba ama tatidang den shisatokden sentong balala ayonga arur.