Centre asem nung Arangtet tatidang agidar

ASLB-i ayongba Arangtet Tatidang Mokokchung Centre – Jubilee Memorial School nung tatidang agiba mapang tangokba noksa nung angur. Mokokchung, July 12, 2019.

Mokokchung, Chiteni/July 12 (TYO): July 11, 2019 nungi tenzüka Ao Senden Literature Board (ASLB)-i mapang shia ayongzüka agiba Arangtet Tatidang (AT) taküma Mokokchung, Kohima aser Dimapur nung centre asem lemsar agidagi.
Taküm iba tatidang nung centre asemprong nung nisung 152-i course balala nung tatidang agütsüdar. Course tongtibang asemsü küma lemsaa lir; under graduate, graduate aser Post Graduate Diploma (PGD).
Mokokchung centre nung nisung 117, Kohima Centre nung 12 aser Dimapur Centre nung 23 lir. Tatidang agütsür 152 rongnung tetsür 121 aser tebur 31 lir. Mokokchung Centre-ji Jubilee Memorial School (JMS), Kohima Centre-ji Chandmari Hr. Sec. School aser Dimapur Centre-ji Mission Hr. Sec. School nung agir. Iba tatidang ya July 13 tashi akatsü.
ASLB-i iba arangtet tatidang ya 2006 nungi tenzüka Ao oshioben aser kaketkeno tejakleni renloka aoba den Aor ajaki zülumen (spelling) lirumedema zülutettsü nükjidong yur mapang shia iba amai ayongzüka akar.