Centre aser Mizoram nung BJP sorkar aliba ajanga terenlok alitsü: PM Modi

Aizawl, Yimpoksüi (November) 23 (Agencies): Northeast nung Congress-i yimsü asüba state tatembangbaji Mizoram lir anungji taruba assembly election nung parnok atsüngdoktsüla aser terenlok maparen nung adentsüla ta tanü Prime Minister Narendra Modi-i ashi.
Mizoram kübok Lunglei nung election nüboyimba sentong ka nung jembidang Modi-i Congress dak tai tongloktsü.
Congress-i ochimashi aser tejak repranga mapa inyaker anungji November 28 assembly election nung Bharatiya Janata Party (BJP) nem sorkar akümtsü tashi agütsüra onoki terenlok bener arutsü, ta pai ashi.
“Mizoram nung terenlok bener arutsü aser ochimashi maliba sorkar ka akümtsü atema BJP-i nenok temoatsü aser posema nungitba aginür. Centre aser state nung BJP sorkartem aliba ajanga Mizoram temaba jenjang nung ajungkettsü” ta Modi-isa shisem.
1993 nungi BJP-i Mizoram nung assembly elections nung toktepyonga arur saka Khristantem teimba sür aliba state nung parnoki menden ka nung danga takok mongudangi arur. Taküm election atema parnoki candidate 39 tashi toktepdaktsür aser taruba state sorkar akümba nung tongtipang shilem agitsü imlar.
“Mizoram nung alirtemi Congress sobaliba atsüngdoktsü atema aser terenlok maparen den sendakteptsü atema maongka tajung lir” ta Modi-isa ashi.
BJP-i Mizo nunger tamangba yimsü aser inyaksangshi kümzüka ayutsü. BJP-i Mizo customary laws aser Linük Temzüng nung inyakyim lateta aliba kümzüka ayutsü ta Prime Minister-isa shisem. Congress-i item onük amer BJP aitsüba atema Modi-i tanü iba olen jembi.
Centre-i northeast renlokdaktsütsü atema alizüng lir aser Act East policy nung shilem ka ama connectivity tajungba kümdaktsütsü. Tesüiba küm pezü tsüngda northeast nung rail, road, air aser internet connectivity network ajungkettsü atema sen crore 90,000 lemzüktsüogo, ta paisa ashi.
Mizoram nung Congress sorkari Centre-i tenzüktsübaba schemes, contracts agütsüba nung ochimashi aser New Land Use Policy o New Economic Development Policy indang sen tim mesüi amshir, ta Modi-isa metetdaktsü.
Ajisüaka, Congress-i parnok dak tai tongloktsüba onüktemji tiyazü ta ashir. “Modi-i jembiba amaji masü saka tesüiba küm 10 tsüngda Mizoram nung Congress minister tem anema ochimashi ken o kecha benoka mali. Mizo nunger ya mato masü anungji BJP-i terenlok bener arutsü ta tiyazü nangzükba nung malangtsü” ta Congress otongdar Lallianchhunga-i ashi.
Lunglei nungi Modi Aizawl-i ao aser idakji Mizoram nung tongti NGOs den ajurutep.
“PM-i Aizawl nung BJP candidate tem den ajurutepa sensaksem aser idangji parnoki Centre dang Mizoram atema special package ka meshi” ta Mizoram BJP President JV Hluna-i ashi.