Centre aser NSCN-K tsüngda ceasefire lidaktsünür: Y Patton

New Delhi, June 25 (Agencies): Centre-i NSCN-K den ceasefire tenangzüktep agitsü atema mepishitsü, ta Nagaland Home Minister Yanthungo Patton-i ashi.
NSCN-K-i sepaitem amakba atema Home Ministry-i iba telok ya nokdanga lir aser ozüngi memelaba telok ta züngshir.
Tan ita tetenzüklen Myanmar nung NSCN-K mendenbuba S.S Khaplang asü aser pa lenisüba kübok March 2015 nung NSCN-K-i India sorkar den ceasefire agiena liasü.
“2015 tatemlen Nagaland state sorkari Khaplang den tongtepratepa yimjung olemtep nung adentsü atema mepishi. Tesüiba mapangtem nunga onoki NSCN-K den tongtepogo saka telemtetba kecha magitet” ta Y Patton-isa ashi.
“Onoki Khaplang den tongtepratepa aru saka pa iba akümli toktsür aoba ajanga inyakyim tasen tenzüktsüsa akümtsü. Onoki Myanmar nung NSCN-K lenisüba tasen den tongtepratepdar” ta paisa shisem.
NSCN-K den ceasefire aliba ajanga Centre-i NSCN-IM den tenangzüktep agia aliba nung tetsükdaktsü ajurutsü asü koda ta osangbeneri asüngdangdang, “Parnoka onok den tangatetba kasa lir. NSCN-IM-ia Naga telungpur telok ajak külemi longjemnür aser NSCN-K-i yimjung olemtep nung denra, parnoki pelashishia agizüktsü” ta Nagaland Home Minister-i langzü.
“Centre-i NSCN-K küm pungu atema nokdangbaji onoki meteta lir. Tesüiba mapang nunga, onoki NSCN-K den olemtep tenzüktsü atema jangraba metetdaktsüogo saka Khaplang asüba sülen, onoki Home Minister Rajnath Singh den iba maparen tenzükshitsü” ta Y Patton-isa metetdaktsü.
Asür Khaplang ya Myanmar nungi Hemi Naga ka liasü aser pai 1988 küm Isak Chisi Swu aser Thuingaleng Muivah na den tesentaktep pilar NSCN-K tentet. Iba mapang asür Isak aser Muivah natia NSCN-IM tentet.