Centre aser State tem longjemer inyaktsüla: Venkaiah Naidu

New Delhi, April 10 (Agencies): Andhra Pradesh Chief Minister, N Chandrababu Naidu-i Central fund lemzüktsüba agi melung masüba aser tanga onüktem nung melung masü o jembiba sülen tanü Union Minister, M Venkaiah Naidu-i, Centre aser state tem kati ka maitsüteptsüla, saka longjemer inyaktsüla, ta ashi.
Urban Development Minister Venkaish Naidu-i jembiba oji ajanga, teloktep party, BJP aser TDP na tsüngda Centre aser state naprong nung melung masüba aser tetsüngda tali adokba kuli sayur.
Deobarnü New Delhi nung shishilembaba tapu balala nung inyaker tetsürtem senden ka nung jembidang Union minister-i, “States aser Centre na külemi longjemer inyaktsüla. Kati ka aitsüteptsü madoker,” ta ashi.
Taoba hopta Andhra Pradesh Chief minister, Chandrababu-i state-i maongka balaka atema akhangba atema Centre-i meinyaker ta melung masüba o jembiba den külemi Centre sorkari senotsü melungsüa melemzüktsüba, AP aser Telangana na nung sorkar mapa inyakertem tsüngda telemsa aliba onüktem ung melung masüba o jembia liasü.
Chandrababu-i Union DoPT Secretary, Sanjay Kothari dang pa melung masübatemji Ato kilonser Narendra Modi nem metetdakjang ta shia liasü.
Venkaiah-i, “Iba ya  Team India lir aser onükji terenlok lir. State tem aser Centre longjemer inyaktsüla,” ta jembi.
Telugu state anaprong (AP aser Telangana) nem kasa temeten agütsütsü atema meranga inyakdar, ta Union minister-isa ashi.
Tesülen osangbenertem den jembidang Venkaiah-i, state temi Centre aitsüba anentsüla, ta ashi.
Pai iba o ya AP chief minister-i jembiba nung ajemdaker jembi asü ta asüngdangba langzüa Naidu-i, “Ni temelung nung shinga bilema mejembi,” ta ashi.