Centre dang China-i lungpok yangluba kuli bushitsü mepishir

Agartala, November 3 (Agencies): China-i Brahmaputra ayong nungi tzü belentsü atema lungpok kilometer 1,000 shi yanglutsü ta asüba kuli metettsü atema Assam Finance Minister, Himanta Biswa Sarma-i Centre dang satellite imaging amshitsü mepishia asüngdangogo.
China-i tzü bendena ayuba chiokba India anema ‘water bomb’ amshitsü akok ta BJP minister-i temulung melemi bilemba olen ka ashi.
“Chinese osangkaket ka nung osang kar liasü saka ibaji sorkaribo magizük. China nung kechi inyaker’ar ni memetet aser tang ibaji India sorkari kuli bushitsüla” ta Sarma-isa osangbener dang ashi.
“India-i satellite imaging indang kanga junga meteta lir aser Chinai yanglur süra, India satellite temia ibaji ngutettsü. Anungji, India sorkari kechi ashir’ar asenoki ataa lidi” ta paisa shisem.
China sorkaribo iba osangji magizüker ta shiogo saka Sarma-i Assam nung tzünglu maruaka aoksa tzümetsüng timtemtem ajuruba atema süoki ia bilemba ashi.
“Tesüiba küm ka atema China-i Brahmaputra indang hydrological data memetetdaktsür. Tang Assam nung ajungben tzümetsüngtem ajurur. Tzüji hydroelectric project nungi chiokba asütsü akok ta onokisa bilem, saka taoba tzümetsüng timtem ajurudang Assam mesüra Arunachal Pradesh nung tzünglu marui liasü” ta Sarma-isa metetdaktsü.
China-i Brahmaputra indang hydrological data yimjak nung metetdakjang ta India sorkari takhangba agütsütsüla. Nüngdakra, international sabang nung iba ken o benoktsü. Centre sorkari China den jembitsü atema onok dang nangzükogo, saka parnoki data ji agütsütsü memulungra international sabang nung jembitsüla, ta paisa shisem.
Chinese osangkakettem nung engineer temi Tibet nung aliba Yarlung Tsangpo ayong nungi Xinjiang tashi tzü abentsü atema kilometer 1,000 lungpok ka yanglutsü atema sentong asameyanger ta metetdakja liasü.
Yarlung Tsangpo ya India nung Brahmaputra ayong lir aser iba ayong ya Bangladesh nung Ganges den sendakteper.
Tripura nung terenlok malibaji Left ajanga lir aser Manik Sarkar sorkar atsüngdokba sülen khuret noklang nung shilem 50 agientsü, ta Assam Minister Sarma-isa ashi.
TV journalist Santanu Bhowmik aser BJP züngsemtem tepsetba ken o tem SIT ajanga bushisüngdanger saka item ken o ya CBI nem agütsütsüla, ta paisa takhangba agütsü.
TV journalist Santanu Bhowmik tepsetba osang tejangja metettsü atema BJP-i November 10 nü Tripura semdangtsü. Pa tepsetba onük ya taruba Parliament session nung tongti süa benoka jembitsü, ta Sarma-isa ashi.
BJP lennir Sarma-i anogo ananü atema Tripura semdang aser iba mapang pai Tripura Police nug SIT ji CPM den yaritepa inyaker ta tai tongloktsü.