Centre-i activist tem apuba pusemer

New Delhi, Luroi/August 29 (Agencies): Linük nung tesem balala nung activist tem Maharashtra police-i puyonga aoba Union government-i pusemogo.
Ministry of Home Affairs nung tongti ketdangser kati ashiba agi, tang pua alirtemi, Naxals tem nem logistical teyari agütsüba kuli ajanga sayuogo.
Maharashtra police-i Sangtennü tongtibang Left-wing activists, kaketzülur aser lawyer tem ki meita ao aser Maoist den sendakba aliba atema aija parnok pongu apu. Bhima-Koregaon lendong dak sendakba nung nisung apuba ajanga tanga human rights activists temi ola adokogo.
Taoba küm Pune nung Bhima-Koregaon lendong ya Elgar Parishad sentong ajanga rongmesodaktsü, kong Luroi/Dec 31 nü Leftist organizations aser activist tem aika dena liasü.
“Tebilemdangba ka züluba aser ajungketba nung kecha tai mali, saka iba tebilemdangbaji tezüluba dak nungi alak ora iba anema inyaktsü nüngdaker. Nai logistical aser senotsü teyari agütsüra nai lendong adoktsüba nung teyari agütsür,” ta ketdangserisa ashi.
MHA ketdangser-i ashiba agi, tang pua aliba activist temi kiralongrartem den tesendaktep yanglutsü merangba ochi ta sayutsü asoshi kuli teperi lir. “Maharashtra police ket nung parnoki leftist ideology den kecha nunga sendaka maliba lokti tem den tesendaktep yanglutsü merangba kuli lir. Parnok kecha nunga mesüktepa mali saka parnok tsükchir ka dang lir,” ta home ministry ketdangser kati ashi.
Iba tatalokba ya yimden yimsüsüba dak sendaka lir ta aitsüba home ministry-i aitsüogo aser ashiba agi, iba ken o ya yimden yimsüsüba dak sendaka mali aser kuli tejangja anguba dak ajemdaker inyaker.
“Taoba sorkar mapang nunga nisungtem puogo. Naxal pusemer G N Saibaba nungi Kobad Gandhi tashi taoba sorkari puogo,” ta ketdangserisa shisem.