Centre-i Angh 4 shimer; Manipur atema Najma Heptullah shim

New Delhi, August 17 (Agencies) : Bodbarnü Centre sorkari state pezü nung Angh inyaktsü nübo shimba metetdaktsüogo aser par pezüprongla BJP den sendaktepa alirtem dang lir.
Taoba Union Minister Najma Heptulla Manipur nung Angh inyaktsü shim aser külen taoba Rajya Sabha MP, VP Singh Badnore Punjab nung kasa menden atema shimba osang metetdaktsü.
Nagpur nungi asemben tashi Lok Sabha MP aser ‘The Hitavada’ osangkaket yimozülur, Banwarilal Purohit Assam Angh inyaktsü shim aser Delhi nungi BJP lennir aser taoba MLA Prof Jagdish Mukhi Andaman & Nicobar Islands nung Angh inyaktsü shim, ta Rashtrapati Bhavan sangdong ka nung metetdaktsü.
Arishi küm 76 tain Heptulla-i taoba ita tu Union Cabinet nung Minority Affairs Minister menden toktsü.
Prime Minister Narendra Modi-i minister tem asoshi arishi küm 75 telatetba ka yanglua aliba ajanga Heptulla-i la menden toktsü ama ajiteter. Iba telatetba nung ajemdaker BJP lennir tejentem- L K Advani aser Murli Manohar Joshi na Cabinet nung meshim aser tena ‘Margdarshak Mandal’ nung  ang shimoka lir.
Meghalaya Angh, V Shanmuganathan-i Manipur Angh mapa repsema inyaka liasü.
Ano, Rajasthan nungi Badnore-i Punjab Angh inyaktsü, ta Rashtrapati Bhavan sangdong nungsa shia lir.
Sangküm Punjab nung assembly elections agitsü lir aser yaküm Angh Shivraj Patil kümsük tembangba sülen Haryana Angh Kaptan Singh Solanki-i Punjab Angh repsema inyaka liasü.
Nagaland Angh Padmanabha Balakrishna Acharya-i Assam Angh repsema inyaka liasü aser tang iba mendenji arishi küm 76 tain Purohit-i melenzüktsü.
Delhi legislative assembly nung MLA inyaker Professor Jagdish Mukhi-i Andaman & Nicobar Islands nung Lt governor inyaktsü. Lt General (Retd) A K Singh melena arishi küm 73 tain Mukhi shimer, ta Rashtrapati Bhavan sangdong nungsa metetdaktsü.