New Delhi, January 24 (Agencies) : Deobarnü Prime Minister Narendra Modi-i ajungben Union Cabinet senden ka ayongzüka agidang Arunachal Pradesh nung President’s Rule alitsü junger ta telemtetba agiogo.
Sorkari Attorney General den asüngdangya asüba sülen Arunachal Pradesh nung law & order mejungi akümba ajanga Centre-i tiyongtsü nung ia inyaktsü tensa ka nung lir ta Union Cabinet-i telemtetba agi.
Supreme Court nung judge tejentemi Arunachal Pradesh indang ken o benoka angadangba mapang ka nung Centre-i iba telemtetba agi.
Iba telemtetba ya Congress-i aitsüogo aser iba onük ya parnoki okadaki benoka raratsü ta metetdaktsü.
“Parnoki arrtsülen aliba state ka tashimeiti kümdaktsür. Iba ya yimtenren mapa nung taremzük melii inyakba sayur aser iba inyakyim nung lennirji Modi lir” ta taoba union minister Kapil Sibal-i ashi.
Ano, Delhi Chief Minister Arvind Kejriwal aser Bihar Chief Minister Nitish Kumar natia Twitter ajanga iba telemtetba atema Centre aitsüba osang metetdaktsüogo.
Yaküm December 16 nü Arunachal Pradesh Speaker Nabam Rebia menden nung anentsütsü atema Congress nungi temulung masür MLA 21-i BJP MLA 11 aser Independent züngsem ana den longjemer assembly session ka alitsü ayongzükba ajanga mangatettep ya adok.
Iba mapang züngsem 60 agi akümba Assembly nungi Chief Minister Nabam Tuki-i anir MLA 27-i assembly session ji ozüng alema ayongzüker ta aija maden.
Anogo ka lir külen, temulung masüba Congress züngsemtem aser opposition MLA tem Chief Minister menden nungi agientsü aser pa melena tangar ka shimtsü atema community hall ka nung adenshia aseembly session ka agi. Iba mapang BJP aser independent MLA temi no-confidence motion ka benok aser ibaji Deputy Speaker T Norbu Thongdok-i agizük.
Gauhati High Court-i temulung masür MLA temi agiba “session” nung telemtetba agibaji khen sota yur külen tatem nung magizük, saka iba sülen Speaker-i iba ken o ji Supreme Court nung benok aser Supreme Court-i Constitutional bench ka nem angadangtsü agütsü.
Arunachal Angh Rajkhowa-i BJP agent ka ama inyak aser temulung masüba Congress MLA tem yaria mapang matongdang assembly session jazük, ta Arunachal chief minister Nabam Tuki-i aitsür.
You must be logged in to post a comment Login