Centre-i Assam tzümetsüng asoshi teyari crore 207 agütsütsü

Guwahati, August 26 (Agencies): Centre sorkari Assam nung tzümetsüng agi kongshiba tesemtem atema senotsü teyari crore 207 agütsütsü, ta tanü Union DoNER minister Jitendra Singh-i metetdaktsü.

Tzümetsüng agi kongshiba tesemtem semdanga nüburtem ajuruba sülen Singh-i, Centre-i state nüburtem akokba tashi agi yaritsü, ta ashi.

“Assam nung kümzükba aser teyari maparen ajak Centre-i reprangdar. Timtemba nüburtem yaritsü asoshi onoki nüngdakba teyari ajak state nem agütsütsü. Kobi melii Centre nungi inter-ministerial team kati tzümetsünga aliba tesemtem semdangtsü,” ta Singh-i ashi.

Paisa, tzümetsünga aliba tesemtem nung tashitak poktetba nokdangtsü atema Centre-i medical team tem yoktsü, ta ashi.

Mongolbar nü Union minister Singh-i Goalpara, Kokrajhar aser Bongaigaon district tem semdanga liasü.

Singh-i tzümetsünga aliba tesemtem semdangba mapang pa den state revenue & disaster management minister, Bhumidhar Barman, BJP MP Bijoya Chakraborty aser state sorkar tongti ketdangsertema liasü.