Centre-i Bihar nem sen cr. 500 lemzüktsür

Patna (Bihar), August 26 (Agencies): Honibarnü Ato kilonser, Narendra Modi aser Bihar Chief Minister, Nitish Kumar nati helicopter nung mener state nung tzümetsüng agi kongshiba tesemtem asadangba sülen state nem sen crore 500 teyari agütsütsü sangdong, iba den külemi tzümetsüng lendong nung asür kibong shia nem sen lakh anana teyari agütsütsü, ta metetdaktsü.
Modi-isa, tzümetsüng agi teraksatsüba asadangtsü atema central team ka state dangi yoktsü, ta metetdaktsüba den külemi insurance company tem danga aluyimertemi takoksa anguba asadangtsü tuyu.
Tanü Modi-i tzümetsüng agi kongshiba tesemtem asadanga senzüba sülen pai Chief Minister Nitish Kumar, Deputy Chief Minister Sushil Kumar Modi aser state nung tongti ketdangsertem den senden ka mena liasü, iba sülen pa Delhi-i meyipa ao.
“Ato kilonseri, pai akokba tashi Bihar sorkar nem teyari agütsütsü ta shiogo,” ta PMO sangdong ka ajanga metetdaktsü.
State nung tzümetsüng agi district 19 kongshi aser item rongnung Purnea, Katihar, Kisanganj aser Araria district tem densema district 13 nungbo takoksa jenti angu, ta osang ka ajanga ashi.
Tzümetsüng ajanga Bihar nung tang tashi nung nisung 418 tashi süogo.
Tanep Ato kilonser Delhi nungi Chunapur Airport tonga aru, aser iba mapang nungji Chief Minister Nitish Kumar, deputy chief minister, Sushil Modi, Disaster Management Department Minister Dinesh Chand Yadav aser Chief Secretary, Anjani Kumar Singh nungeri pa agizüka liasü.