Centre-i Bru refugee nem teyari magütsür

Agartala, Mongputeni (October) 5 (Agencies): Tripura nungi Bru refugee tem meyipa yokba mapa nung ano tetsükdaktsü ka ajuruogo. Refugee tem Mizoram-i meyipa aoba maparen takok ngua inyaktettsü akok ta bilema lia, iba mapa anenogo.
Tang Panisagar Sub division nung aliba Kasko camp nung kibong 577 nungi nisung 4,800 shi ka azüngmeyak tia nung lir.
October 1, 2018 nungi Center sorkari Mizoram nunger Bru (Reang) refugee nem ration angati aser tanga teyari agütsüba anenogo. Bru refugee temia meyipa aotsü memulunger aser Centre sorkari parnoki akhangba ama meinyaktsür ta tai tongloktsür.
Sorkari teyari agütsüba rongnung anogo shia tain nem sen 5 aser tanur nem sen 3.5 agütsüba dena liasü. Kasaji tain refugee ka nem anogoshia jang gram 600 aser tanur nem gram 300 agüja liasü. Maneni, refugee shia nem anogoshia metsü gram 7 agütsüyonga aru.
Parnok nem küm asem nung khen slipper ka, küm shia tebur nem shirt aser tetsür nem skirt agütsüyonga aru. Küm asem shia kombol ka, ita shia kibong ka nem sapon ka, sen 20 jenjang totzü aser küm asem nung khen merla sü agüja aru.
Tenangzüktep agiba nung takhangba onük kar densema liasü, ta refugee temi ashir. September 10 nü Aizawl nung senden ka amendang Bru refugee temi takhangba onük kar agütsüdang parnok Mizoram kübok Mamith aser Kolashib district tem nung alitsü dena liasü.
Parnoki Nualmam, Rtepa, Thangjoa, Jowar, Khanthuam, Khaidor, Molthuam and Orpoarameng, Thinliang aser Rajdali tesemtem nung linür.
Mizoram nung parnok alitsü kiojentem meyangluzük tashi parnok Tripura nung lidakjang ta refugee temisa takhangba agütsü.
Kasko camp nung alirtem Jhon Mesca, Charlie Molsoi, Villager Ram Kumar Reang and Nandita Reang, Sonajoy Reang nungertemi osangbener den jembidang, Centre sorkari nangzükba ama meinyak tashi parnoki Tripura toktsür maotsü ta ashi.