Centre-i CAB meyipa reprangshimtsüla: MP Kenye

Kohima, November 29 (TYO): Centre-i Parliament nung Citizenship Amendment Bill (CAB) 2016 benoktsü merangba anema tanü New Delhi nung opposition teloktemi lungkak aitba sentong ka agidang Nagaland nungi Rajya Sabha MP K.G. Kenye aden.
Tanü opposition teloktemi Centre dang asüngdangya mesüi NE state tem nung tashiyim mapa meinyaktsü atema kümdangtsü osang sangoktsü.
CAB ajanga Northeast nung tali ashishitep adoktsü aser iba ajanga tensa kanga mejungi akümtsü ta opposition lennirtemi ashi.
CAB ya North East State tem atema tebilemtsü tulu ka lir kechiyong iba tesemj linük 5-i meketbanga lir. Anungji, Centre-i iba atema khen meyipa reprangshimtsüla aser ozüng küma mebenoktsüla, ta MP Kenye-i ashi.
Kenye-i CAB anema jembiyonga arur aser pai taküm Lok Sabha election magidang Parliament nung CAB ya original form nung mebenoktsüla ta shia liasü. MP Rajya Sabha, Nagaland indang PRO-i sangdong ka nung ashi.
MP Kenye-isa Centre sorkar dang north east state shia den jembishinü asüba sülen Bill meyipa reprangshi atema ayongzük.
2018 küm Lok Sabha nungi Parliamentary Standing Committee-i iba bill junga mereprangshi, ta paisa shisem.