Centre-i Citizenship bill benokba CRPC-i pelaa agizüker

Guwahati, July 23 (Agencies): Centre-i Bangladesh, Pakistan aser Afghan linüktem nungi minority refugees nem senso agütsütsü atema bill benokba atema Assam nung senso temeten atema inyakba tentet, Citizens’ Rights Preservation Committee (CRPC)-i ibaji pelaa agizükogo.
July 19, 2016 nü Lok Sabha senden nung Citizenship (Amendment) Bill, 2016 benoka liasü, aser iba bill ajanga Bangladesh, Pakistan aser Afghanistan linüktem nung reshikangshi tia ajurur Hindu, Sikh, Buddhist, Jain, Parsi aser Khristan tem nem India senso akümtsü atema mepishitsü temeten agütsür.
Sangdong ka ajanga CRPC general secretary, Bidhayak Das Purkayastha-i, iba telemtetba ya meimchir jenjang ajungtsü atema inyakba ka lir, ajisüaka iba bill nung ano temelenshi kar nüngdaker, ta ashi.
Iba bill ajanga ashiba agi, India senso akümtsü atema memepishidang bendanger kaji linük nung tajemba agi küm tenetbosa alitsüla, ta shia lir. Iba dak sentakba nung CRPC-i, ibaji ita trok mesüra iba dang nungi tajemba akümtsüla, ta ashi.
CRPC tongti shisalen tuyur, Hafiz Rashid Ahmed Choudhury-i, tesüiba hopta ishika tsüngda Bangladesh nung aliba Hindu nunger kangshia meindokba den külemi nisung jenti tepsetba, tashiyim amshia tetsür raksatsüba aser tamangba tesemtem raksatsüba tatalokbatem aitsüogo.