Centre-i Dalit nunger atema inyaker: Narendra Modi

Varanasi, January 22 (Agencies): Tawa Hyderabad nung Dalit nunger PhD shisashir ka soseta asüba ken o nung Centre sorkar aitsüba mapang ka nung tanü Hokolbarnü Ato kilonser Narendra Modi-i, par sorkari dalit nunger, sensakertem aser tepetzük tia nung alirtem atema nendaka inyaker, ta ashi.
Pa adokba Lok Sabha constituency, Varanasi nung matamabensartem nem teyari balala agütsüba sentong ka nung jembidang Modi-i dalit nungerbo tetshi, ajisüaka Hyderabad nung Dalit nunger kaketshir Rohith Vemula soseta asüba indangba pai mejembi.
Rohith soseta asüba ken o nung opposition party tem aser University kaketshirtemi Union minister ana menden nungi agientsü takhangba agütsüdar.
“Iba sorkar yagi sensakertem, dalits, tepetzük tia nung alirtem atema inyaker aser taküm nung timtem ajururtem atema langka inyaktsütsü merangtsü. Iba sorkar yagi sensakertem taküm jenjang tajungba akümtsü atema inyaker aser iba atemaji sorkari maneni meranga inyakdar,” ta Modi-i ashi.
Modi-isa mapang shia ajaklen nungi taitsüba balala arur aser mangatettep ken o balala nung pa dendaktsütsü meranger, ajisüaka sensakertem atema inyakba lenmang nungi pai mepilatsü, ta ashi.
“Khenkhenbo alima ajaki ni arishir ama ni bilemer. Anepdang nungi tenzüka tesem ajaklen nungi ni aitsür. Iba ya, Modi pa lenmang nungi aienshidaktsütsü atema parnoki merangba lir,” ta paisa ashi.
“Ajisüaka sensakertem aser tepetzük tia nung alirtem yaritsüji kü omen, aser ibaji ajanga ni kü lenmang nungi matsüngshir,” ta Modi-isa shisem.