Centre-i Doyang Lake nung terenlok mapa inyaktsü: Prakash Javadekar

November 15, 2015 nü Environment Forest & Climate Change Union Minister, Prakash Javadekar aser tongti ketdangsertemi Pangti yimtak Molulem amungba tesem semdangba mapang tangokba noksa nung angur.

New Delhi, November 16 (Agencies): Hombar nü Union Minister for Environment Forest & Climate Change, Prakash Javadekar-i Pangti yim semdangba sülen molulem amungdak tesem semdangogo.
Union Minister-i, “Kobi melii Centre-i Doyang Lake tesem ya ozü reprangertem atema eco-tourism tesem atema terenlok katsütsü,” ta ashi.
Paisa, “Tanübo alimai Nagaland nung Pangti yimji alima nung Amur Falcon yimtiba ta züngshir, kechiyong minute 30 tsüngda ozü million ka dak tema nguogo. Iba ya kodanga mongudangba aser jangratemtsü tesem ka,” ta ashi.
Molulem amungba tesem nung yimtaklirtem den jembidang Union Minister-i yimtaklirtemi ozü kümzüka aser wazüka ayuba atema tenüngsang agüja, “Nisung ajaki Pangti yimertem dang nungi iba mapa tajung angazüktsüla,” ta ashi.
2013 küm mapa tajung tenzüka toktsüba aser iba ozü kümzüka ayuba nung shilem agirtem ajak nem Union minister-isa tenüngsang agütsü.
“Molulem ozü ano tali rajema angatettsü atema ozütem tagging asütsü” ta paisa ashi.
Molulem ozü kümzüka ayuba atema paisa Forest department, Arogotem aser molungtet teloktem nem tenüngsang agütsüogo.
Molulem kümzüka ayutsü maparen ya 2013 küm tenzük aser iba mapang nungi tenzüka forest guards aser Pangti yim nungi temulungertemi molulem amungdak tesem mita anüker.
Tanü Union Minister den Minister for Forest Dr. Neikiesalie Kire, Department of Environment, Forest & Climate Change Principal Secretary N.N.Zhasa IFS, Principal Chief Conservator of Forest & Head of Forest Force, Lokeswara Rao IFS, Chief Wild Life Warden Nagaland, S.P.Tripathi IFS, Addl. Principal Chief Conservator of Forest I.Panger Jamir IFS aser Addl. Private Secretary to Union Minister Sunil Kulkarni nungertem liasü.