Centre-i Haj Subsidy agintsü telemtetba agiogo

New Delhi, Aenjeti 16 (Agencies): Centre sorkari Haj temeshi aieni aoertem nem subsidy agüja aliba aginogo. Minority Affairs Minister, Mukhtar Abbas Naqvi-i ashiba agi, iba telemtetba ya linük nung lokti tilatem ajungkettsüba onük dak sendakba nung tebendang makai inyaksangshitsü asoshi agi.
Naqvi-isa ashiba agi, India linük nüjiso ngur tang mezüngbuba temeshi aieni aoer parnok lakh 1.75 Haj-i teyari kecha mongui aotsü. Taoba küm temeshi aieni aoertem parnok lakh 1.25 liasü.
Union minister-i ashiba agi, iba teyari agütsüba anenba ajanga sorkar sen crore 700 kümzüka yutettsü aser iba ya linük nung lokti tilatem aser talisa tetsürtem nem kaketshisatsü agütsüba nung amshitsü.
Anogo eshika tejakdang sorkari Muslim tsürtem arishi küm 45 tema nungibo tebur ka lenisüba kübok masü yonga, tetsür pezü külemi temeshi aieni otettsü, ta temelaba agütsüba sülen tang sorkari Haj subsidy ya agientsü asoshi telemteba agiogo.
Naqvi-isa ashiba agi, Saudi Arabia sorkari India nungi Haj temeshi-ienertem rong ajanga senzükdaktsütsü ta shiogo, aser iba dak sendakba nung ken o tembanga jembishinütsü asoshi linük ana nungi ketdangsertem ajuruteptsü.
All India Muslim Personal Law Board nung tekolakba, Kamal Farooqui-i iba telemtetba ya pelashishia agizükogo. Pai ashiba agi, nüburtemi Muslim nungertem sorkar teyari ajanga kanga ajangzükdar, ta aikati bilemer. “Ajisüaka iba sorkar scheme ajanga Air India ang tali ajangzüker,” ta pai ashi.
Supreme Court-i 2012 küm iba subsidy ya tanem tanemi ajemja 2022 küm tashi nungbo agintsü asoshi tetuyuba agütsüba sülen Centre-i taoba küm Haj subsidy dak sendakba nung ken o asadangtsü asoshi nisung trok agi akümba lokti ka tentetja liasü.
Supreme Court ajanga iba subsidy agütsüba agiena education aser lokti terenlok maparen balala nung amshitsü asoshi sorkar nem tetuyuba agütsü.