Centre-i HNLC telok noktanger

Shillong, November 18 (Agencies): Centre-i Meghalaya nung amenoka aliba Hynniewtrep National Liberation Council (HNLC) noktangogo.
HNLC aser parnok den adenba telok ajaki Khasi aser Jaintia kintem aliba tesemtem nung ozüng alema mapa inyaker, ta Union home ministry-i sangdong ka nung ashi.
Iba telok yagi civilian tem dang nungi senotsü meshia merenshir aser amokmerener. Parnoki tanga Northeast telungpur teloktem den tesentaktep ayur aser tashiyim mapa inyaker. Parnokisa Bangladesh nung teseptem amenoka lir aser züngsemtem jenokdaksüba den training agütsür, ta Union home ministry-i ashi.
HNLC-i inyakba maparen ya India linük anema lir aser lendong keta lir. Iba ya mazüokra, HNLC tanaben telok kümtetshitsü aser nübo teimba den prangpong bener nisung takümtem samatsütsü, ta MHA-isa metetdaktsü.
MHA-isa HNLC-i taoba kümtem tsüngda ozüng alema mapa inyakbatem kar shia lir. Iba ya January 1, 2015 nungi July 31, 2019 tashi inyakba lir aser iba nung tatalokba pezü nung civilian ka tepsetba dena lir.
Iba mapang tsüngda HNLC züngsem 16 apuba, prangpong pezü ngutetba, parnok züngsem 14 tashi temai adokba aser nisung pezü pur aoba ataloka liasü.
November 16, 2000 nü HNLC ya noktanga liasü saka mapang tatsüka lir iba tenokdangbaji agien.