Centre-i J&K nung ceasefire sangdong

New Delhi, Monupii/May 16 (Agencies): Muslim nunger benjung ‘Ramadan’ mapang nung tanü Centre sorkari Jammu & Kashmir nung ceasefire sangdongogo.
Yimjung meimba Muslim nunger tesünep nung temeshi ita amongtsü atema ceasefire ji nüngdaka liasü, ta Centre sorkari metetdaktsü.
Home Ministry-i sangdong ka ajanga, temeshi ita mapang nung Jammu & Kashmir nung operation maotsü atema security sepaitem dang metetdaktsüogo, ta ashi.
Jammu & Kashmir Chief Minister, Mehbooba Mufti-i Monupii/May 09, 208 nü Centre sorkar dang Ramadan mapang state nung ceasefire alitsü atema mepishia liasü, aser iba temepishibaji agizüktsü atema telemtetba agiba sülen Union Home Minister, Rajnath Singh-i Jammu & Kashmir Chief Minister nem iba osangji metetdaktsü.
Ajisüaka Home ministry sangdong ajanga ashiba agi, ceasefire sangdongaka sepaitem amak nungbo sepaitemia raratsü, mesüra tai maket nüburtem kümzüktsüsa tensa ajurura sepaitemi raratsü.
Kasa sangdong ajanga, “Iba mapatong nung ajaki amaliteptsü ta sorkari imlar aser ibaji ajanga Muslim nunger adianutem aser aianutem timtem kecha majurui Ramzan mongdaktsütsü mepishir,” ta metetdaktsü.