Centre-i Kerala tzümetsüng lendong tulu ta züngoker; Northeast state temi teyari agütsür

New Delhi/Guwahati, Luroi (August) 20 (Agencies): Kerala tzümetsüng ya lendong tulu ka lir ta Centre-i sangoktsüogo. Iba osang ya tanü home ministry ajanga ashi.
“Kerala nung tzümetsüng aser anentsüh timtem ajurubatem nung ajemdaker, lendong tulu ka ta züngoker” ta home ministry ketdangser kati ashi.
Anogo 10 tashi Kerala nung tzünglu kanga aruba ajanga lendong balala nung nisung 239 tashi asü. Tesem balala nung nisung 700,000 dak tema relief camp 5,645 nung jenoka lir ta state sorkari osang metetdaktsüogo.
Iba lendong nung sen crore 19,200 shi akoksaogo ta Kerala chief minister Pinarayi Vijayan-i metetdaktsüogo. State disaster management ketdangsertemi ashiba agi gari lenmang aser apu kilometer 10,000 dak tema raksaogo.
Tzümetsüng ajanga Cochin International Airport kongshia lir aser ketdangsertemi hopta ishika sülen ang iba airport lapoktettsü ta ashir.
Alima tesem balala nungi Kerala nem teyari agütsür. State sorkari aikati senotsü teyari agütsütsü nangzükogo aser NGO temia tang nüngdakbatem bendena teyari agütsüdar.
Non-resident Indians aser Gulf linüktemia senotsü teyari agütsür aser taoba hopta Prime Minister Narendra Modi-i Kerala nem sen crore 500 teyari agütsüba osang metetdakja liasü.
Assam sorkari Deobarnü Kerala nem sen crore 3 agütsütsü osang metetdaktsüogo.
Tanga northeast state tem den anidaka Arunachal Pradesh-ia Kerala nung relief maparen inyakba nung akokba tashi yariteptsü ta metetdaktsü.
Chief Minister, Pema Khandu-i Chief Minister’s Relief Fund nungi tang rongdak teyari ama Kerala nem sen crore 3 agütsüba osang ashi.
Arunachal Pradesh aser Kerala nunger tsüngda akhidang nungi tesentaktep tajung liasü. Timtem ajurur ajak den khuret lemsateper, ta Khandu-i Twitter nung ashi.
Manipur Chief Minister, N Biren Singh-i aniba BJP sorkaria Kerala nem sen crore 2 teyari agütsüogo aser Nagaland Chief Minister Neiphiu Rio-ia Kerala disaster relief fund nem sen crore 1 agütsüba metetdaktsü.