Centre-i Manipur dang telungpurtem tepsetba osang meshir

Imphal July 06 (Agencies): Union Home Ministry-i Manipur sorkar dang tawa state nung taoba mapang telungpurtem tepsetba osang tejangja meshiogo.
Osang angazükba agi, taoba mapang telung nung alirtem tepsetba atema Centre sorkar tebilemtsü akar, aser iba ya ajanga state nung yimjung inyakyim mapang atsülangtsü akok.
Mongolbarnü Churachandpur nung Hmar National Army Chairman, Lalthanshang Hmar par ki anasa kahset. Tamalena Chandel district nung United Kuki Liberation Front nung captain, Jamkholal Zou-a tepseta liasü.
April 21, 2016 nüa taoba mapang PREPAK Chairman, Ningombam Nabachandra aser pa gari anisang na Imphal East district nung aliba 7 Manipur Rifles camp telung nung aliba ‘safehouse’ nung tepset. Tena tepsetertemji jena otet.
State nung tatalokba balala nung taoba mapang telungpurtem kar tepsetogo.
State nung taoba mapang telungpurtem tepsetba tatalokba kanga bulua akümdang Imphal West district nung tajemba agi telungpur telok katibo ano raraba oset bena arur.
Manipur nung yimjung maparen ya 2000 küm May ita nung tenzük, iba mapang nung army temi tribal telungpur telok kar anema operation aoba anentsü tenangzükba agi. Ajisüaka state sorkari sorkari nangzükba ama meinyak, ta nisung kari aitsür.
Home portfolio bena alisang Chief Minister Okram Ibobi Singh-i, operation anenba nung par sorkar dang mulung lemteta kecha mashi, ta metetdaktsü.
Iba tezüngzüktep agiaka police aser paramilitary sepaitemi maneni taoba mapang telungpur  apu aser karbo tepset. Iba mapang nung Union home ministry tiyongtsüi ait.
Tesüsa 2008 August ita nung ano tezüngzüktep ka agi, iba mapang nungjibo Manipur sorkara densem. “Iba tezüngzüktep agiba sülen tribal 15 aser non-tribal 3 telungpur telok Centre den yimjung olemtep nung aden. Iba mapang nungjagi parnok designated camps balala nung toktsüogo,” ta ketdangser kati ashi.
Ajisüaka item telok nung lenir karbo stipend tera dang anguba ajanga mepelar. Talisa telemtetba ka dangi arutsü atema yimtenren ken o jembitsü atema meinyaker. Taoba mapang telungpurtemi raraba prangpong-injang toktsüogo, aser parnok tepsettsü ta maneni tsübua lir.
Ano külen, sorkari yimtaklirtem aliba tesem anasa taoba mapang telungpurtem designated camps amenoktsü atema sentong yanglubaji yimtaklirtemi ashishir.

You must be logged in to post a comment Login