Centre-i Manipur indang tensa meyipa reprangshi

New Delhi, January 21 (Agencies) : Manipur nung anogo 80 tashi highway tongtipang ka mnung rongsenkettsüng tsütsü mokdangba atema Centre-i tanü iba onük meyipa reprangshiogo.
Home Minister Rajnath Singh menden ser amenba inter-ministerial senden ka nung Petroleum Minister Dharmendra Pradhan aden aser parnoki Manipur nung jangotsü aser petroleum products indang osang metetpela aser supply peria agütsütsü atema tebilembatem lemsatep.
Union Home Secretary Rajiv Mehrishi-i anir tongti ketdangsertemi senden nung osangtem agütsü aser parnoki supply dak sendakba maparen inyakba indang metetdaktsü.
Manipur nung jangotsü, petrol, diesel aser LPG cylinder tem indang jenjang kanga tur ayoker aser iba ya centre sorkar atema tebilemtsü lir, ta ketdangsertemisa ashi.
November 1, 2016 nungi United Naga Council (UNC)-i NH-2 (Imphal-Dimapur) aser NH-37 (Imphal-Jiribam) highway tem mokdanger lungkak aiter. Iba highway ana ya Manipur atema tongtipangtiba lenmangtem lir.
NH-37 bo tera lapokogo saka NH-2 nungbo traffic mali aser Ministry of Home Affairs(MHA)-i NH-2 lapoktsü atema mapa inyakyonga arur.
Rongsenkettsüng mokdangba dak sendakba onük olmteptsü atema November 15, 2016 nü Centre-i Manipur sorkar aser United Naga Council New Delhi-i jaok saka iba nung Manipur sorkar maden.