Centre-i Manipur tzümetsüng tensa asadangtsü

New Delhi, August 06 (Agencies): Brihostibar nü DoNER Minister Jitendra Singh aser Minister of State for Home Affairs Kiren Rijiju nati Manipur nung tzümetsüng agi amshiba tesemtem semdanga tensa asadangogo, ta home ministry-i sangdong ka ajanga ashi.
Tenati item tesem semdangba mapang Manipur Chief Minister Okram Ibobi Singh den phone ajanga iba tensa atema sensak asemdang centre-i akokba tashi state nem teyari agütsütsü ta nangzükogo.
Centre den külemi state nung tatartem aser state ketdangsertemi Chandel district nung iba lendong agi kanga mejungi amshir aliba Joumol yim, Thoubal district aser anasa aliba tesemtem ajak aerial ajanga asadanga liasü, ta sangdong ajanga ashi.
Kasa sangdong ajanga ashiba agi, parnoki state sorkar aser local media dena senden ka mena liasü aser iba mapang chief secretary-i tzümetsüng agi raksaba osang tejangja agütsüogo.
Senden nung Ato Kilonser tenüng nung tenati asür kibong tem den asüku lemsatepa liasü.
Iba den külemi tenati National Disaster Response Force dena sensaksem ka agia liasü.