Centre-i Maoists-i timtem agütsüba state 7 senden ayonger

New Delhi, October 20 (Agencies): Maoist dak sentakba rara tali tesashiba akümba ajanga Centre sorkari November 3 nü Moaist telungpurtemi kongshiba state tenet nungi chief minister tem senden ka ayongzükogo.
Union Home Minister Rajnath Singh leniba nung agiba senden nungji state tenet- Chhattisgarh, Jharkhand, Bihar, Andhra Pradesh, Maharashtra, Odisha aser Telangana nung Left-wing extremism (LWE) tensa indang o lemteptsü, iba dak alia state o state na tsüngda amalitepa telungpur anema inyaktsü atema-a o lemteptsü.
Home Ministry nung ketdangser kati, “Iba senden nung CPI (Maoists) anema tentettemi apusotsü, LWE anema operation sentong aser LWE züngsemtem nem senotsü teyari agütsüba nokdangtsü onüktem nung jembitsü,” ta ashi.
Anogo ka piyong senden nungji, tang Maoist-i kongshiba state tem nung paramilitary sepai 1,10,000 ji tajungtiba nung amshitettsü, tapoktsü oset aser IEDs (improvised explosive device) auyaba, LWE rara nung asür kibongtem nem teyari aser NIA o state police force tem den Maoists aema benoka aliba ken otem indang-a jembitsü.
Iba dak alia item state tem nung mobile tower 2,199 amenoktsü, lenmang aser apu yanglutsü, Forest Right Act kübok High rejection rate aser tribals nem title agütsüba reprangshitsü aser bank a reprangshitsü.
Item state nung Maoists-i kongshiba district 105 lir, aser item rongnungjagia district 35 tamajungtiba lir.