Centre-i Mizoram dang Myanmar refugee tem meyipa yoktsü tuyur

Aizawl, June 18 (Agencies): Union Home Ministry-i Mizoram sorkar dang Myanmar senso 220 tashi Myanmar-i meyipa yoktsü atema tetuyuba agütsüogo.
November 2017 nung Mizoram kübok Lawngtlai district nung Myanmar refugee 220 shi ka yimtsüng pezü nung liyonga arudar. Parnok ya kibong 54 nungi lir aser Arakan (Rakhine) state toktsür jena arurtem lir.
Union Home Ministry-i Mizoram sorkar dang refugee tem tekaratiba nung meyipa yoktsü atema shiogo, ta Mizoram Home Department ketdangser kati ashi.
Assam Rifles aser district administration nungi osang balala angazükba agi state sorkari refugee tem indang maitsü jangjatsü atema tetuyuba ka agütsüogo, ta Home Minister Lalchamliana-i ashi.
“Refugee tem re-identification maparen tang teinyakdak lir aser iba ya tembangba sülen parnok Myanmar-i yoktsü” ta Lalchamliana-isa ashi.
November 2017 nung Myanmar Army aser Rakhine nung amenoka aliba Arakan Army tsüngda khatepdang refugee 1,700 dak tema Myanmar toktsür Mizoram kübok Lawngtlai district nung arua jenok.
“Refugee teimbaka Myanmar-i meyipa ogo saka parnok 220 shi ka meyipa aotsü nungnang” ta ketdangser kati ashi.
Refugee temi pei talidak ki yangluogo aser Mizoram litsü nung alu ayimtsü tenzükogo, ta paisa ashi.
Ano külen, Myanmar nungi Rohingya Muslim nunger 738,000 shi ka Bangladesh kübok Cox’s Bazar nung jenoka lir.
August 25, 2017 nungi tenzüka Myanmar nung kin o kin tsüngda mepetmesü adoka raratepba sülen refugee tem Bangladesh nung oa jenok.
Bangladeshi refugee camp tem nungi Rohingya Muslim nungertem ozüng alema India kübok Northeast state temi arur.
India kübok North East state pezü – Arunachal Pradesh (520 km), Manipur (398 km), Nagaland (215 km) aser Mizoram (510 km) temi Myanmar den kilometer 1,643 shi arrtsüa lir.