Centre-i Muslim nunger nem tashi agütsütsüla: Owaisi

Hyderabad, September 28 (Agencies): Bodhbarnü AIMIM tongti lenir, Asaduddin Owaisi-i, Narendra Modi’er sorkari atangji Muslim nunger nem tashi agütsütsü atema bilema lira parnoki Muslim nunger nem mapa wazüka yutsütsü aser scholarships agütsütsü atema mera agia inyaktsüla, ta ashi.

Bodhbarnü Hyderabad nung osangbenertem den jembidang All India Majlis-e-Ittehadul Muslimeen (AIMIM) lenir Owaisi-i, “Modi’er sorkari atangji minority atema bilema lira iba kuliji sayua nashi kümzükertem anentsütsüla,” ta ashi.

Hyderabad nungi Lok Sabha züngsem Owaisi-i, Muslim nunger nem tashi agütsütsü atema Panchayats ayonga akabaji masü saka meratem agia inyaktsüla, ta ashi.

Sorkari Muslim nunger atema panchayats akatsü aoyongba dak sentakba nung pai iba o ya jembi.

Mezüngbuba panchayat ji Haryana nung akatsü.

Pai ashiba agi, Muslim tsür ana tashiyim amshia raksatsüba aser Muslim nunger anati nashishi achi ta tai tonglokja tepsetba state nung Centre sorkari Muslim nunger atema mezüngbuba panchayats ayonger.

Paisa, Ato kilonser Narendra Modi-i minority tem atema bilema lira iba kuliji sayutsü atema pai Rashtriya Swayamsevak Sangh (RSS) aser Bharatiya Janata Party (BJP) lenirtemi minority tem melung yirutsüsa jembiba otem nokdangtsüla, ta ashi.

Owaisi-i ashiba agi, Muslim nunger nem tashi agütsütsüji linük temzüng nung Modi’er sorkar teinyaktsü mapa lir.

AIMIM lenirisa Mumbai High Court tetuyuba kübok Maharashtra nung Muslim nunger nem sorkar mapa shilem pongu shiteta yutsütsüla, ta ashi.

“Nenoki (Centre) Haryana nung Jat kin nem mapa shiteta agütsür, Rajasthan nung sensaker nem aser Gujarat nung Patel kin nem mapa shiteta yutsür. Ajisüra Maharashtra nung Muslim nunger nem mapa shiteta yutsütsü atema shibai nenok nokdanger?” ta pai asüngdang.

Owaisi-i, sorkari Jammu & Kashmir nung panchayats ayonga katsütsüla, kechiyong yangji Kashmir nüburtem den inyaktsüji rongdak nüngdak ka kümogo, iba den külemi yangji nisung 90 shi süogo anungji Kashmir nüburtem den jembitsüla, ta ashi.

“Nenoki tashi agütsüba indang jembir, saka kechiba nenoki minority nungi Aligarh Muslim University aser Jamia Millia anema inyaker,” ta paisa asüngdang.

India-i taruba ita Pakistan yimtiba, Islamabad nung ayongba SAARC senden nung madentsü telemtetba agiba atema tasüngdangba ka langzüdang Owaisi-i, “Sorkari telemtetba shitak agiogo, kechiyong Pakistan-i Lashkar-e-Toiba aser Jaish-e-Mohammed ama kiralongrar teloktem nokdangtsü atema kecha meinyak,” ta ashi.