Centre-i Naga nunger taginübatem tongtsütsü: Rajnath Singh

Kohima, December 8 (TYO): Centre sorkari Naga nunger taginübatem tongtsütsü atema tenangzükba agia mapa inyaker ta Union Home Minister Rajnath Singh-i ashi.
Kisama nung Hornbill benjung anogo 8 buba amungdang Rajnath-i iba osang sangoktsü.
“Prime Minister Narenda Modi lenisüba kübok Centre sorkari Naga nunger tarutsü tia tajungba kümdaktsütsü atema mapa inyaker” ta paisa shisem.
Nagaland nung teti atema yimjung bener arutsü teimla tulu lir aser yashi state sorkar aser taoba MLA o MP temi sangküm agitsü aliba state general election matongdangsa Naga yimten latettsü atema mepishiogo.
State sorkari Naga nunger nem Khristmas sempet ama yimten ken o latettsü atema Centre dang mepishiba atema Hornbill benjung nung adener osangbenertemi Rajnath Singh dang asüngdang saka pai “onoki akokba tashi merangdar” ta dang langzü aser tanga olen kecha mashi.
Nagaland-i Myanmar den arrtsütepa lir aser iba atema Centre sorkari India-Myanmar arrtsü anasa alirtem timtem majurutsü atema free movement regime maparen yanglushitsü, ta Home Minister-i ashi.
“Iba mapa reprangshimdang, onoki arrtsü adena shishilembatepba ajungkettsü atema land custom station tem lapoktsü. Iba ajanga ozüng alema shibelenba aser tanga ozüngi memelaba mapatem nokdangtettsü” ta paisa shisem.
India aser Myanmar arrtsü anasa alirtemi free movement regime kübok travel document kecha melii semdangteptsü akoker.
Nagaland-i North East state tem yimjung, azükaru aser terenlok leni anitsü atema maongka lir. Nagaland nung yimjung bener aruba aser tashi aitba ajanga tanga state temia ajizüktsü, ta Rajnath-ia shisem.
“Nagaland nung ali rongsen jenti lir aser sempet aketertem tasüng lir, Nagaland nung yimjung aliba ajanga rongsenkettsüng aser mapa tsütsü lenmang aika lapoktsü aser azükarua alitsü” ta paisa ashi.
Nagaland-i rongsenkettsüng tsütsü tanga advance State tem meneptsü atema Infrastructure development nüngdaker. Nagaland ya South East Asia den tongti lenmang ka akümtsü akok aser connectivity ajungba ajanga entrepreneur aser shishilembartemi maongka jenti angutsü, ta Rajnath-isa metetdaktsü.
Hornbill benjung atema pai ashiba agi, iba tepuatsü aketba benjung ya Nagaland nung benjung mongpu tetenzükdang amunger aser iba benjung ajanga India nung alirtem dang masü saka alima tesem balala nungi nisungtem atsür arur.
“Iba benjung ajanga Nagaland nung alirtem külemi tejakleni aoba sayur aser temeyoktep nung tashi lir ta asüba kuli sayur” ta Rajnath-isa shisem.
Tanü Adviser to MHA, Dr. Hari Krishna Paliwal-i Union Home Minister meina aru.
Kohima semdangba sülen tanü Rajnath Singh-isa Dimapur nung Assam Rifles Training Centre & School semdanga liasü aser iba mapang pai Mahila recruits training agiba reprang.
Iba sülen pai K B Limbu Swimming Pool aser NB Thapa Indoor Sports Complex lapoktsü.
Training Centre indang auditorium complex nung Rajnath-i linük wako salatsü aser pai Sainik Samellan o jembidang, “Assam Rifles-i North East Region nung tensa azüoka ayuba, yimjung aser terenlok bener aruba atema kanga pelar” ta ashi.
Paisa, Assam Rifles nung sepaitem atema mapa kar tenzüktsüba osang metetdaktsüba den Assam Rifles-i tasütait mapa jenti inyakba atema tenüngsang agütsü.
Assam Rifles-i North East tesem kübok kinükkisang ajaklen anükba atema pai pelaba ashiba den atangji Assam Rifles ya ‘Friends of the North East’ lir ta shisem.
Assam Rifles Campus, Sukhovi Dimapur nungi pa helicopter ka ajanga Dimapur airport tonga aru aser Indian Air force tayimtsü ka nung pa Delhi-i meyipa ao.
Dimapur airport nung Union Home Minister Rajnath meyipa aodang Commissioner Nagaland, Sentiyanger IAS, DC Dimapur, Sushil Kumar Patel, IAS, Commissioner Police Dimapur, Limasunep, state sorkar ketdangsertem, CISF aser Airport ketdangsertem liasü.