Centre-i Nagaland nung anünga aliba project tem tembanga inyaktsü

New Delhi, September 02 (Agencies): Nagaland nung metembangi aliba project tem tembanga inyaktsü asoshi Centre-i tongtibangsüa inyaktsü, ta Centre sorkari tanü metetdaktsüogo.
Tanü New Delhi nung Nagaland Chief Minister, T R Zeliang-i Union Minister of State (Independent Charge) for Development of North Eastern Region (DoNER), MoS PMO, Personnel, Public Grievances, Pensions, Atomic Energy & Space, Dr Jitendra Singh ajurua senden ka amendang pai Singh dang state nung DoNER Ministry indang NLCPR (Non-Lapsable Central Pool of Resource) projects atema süoka jembiba den külemi pai asüng nungi tenzüka Malaysia linük semdangtsü aliba indang metetdaktsü.
Singh-i Chief Minister, T R Zeliang dang, state sorkari agütsüba tongtibang project ajak inyaktsü atema DoNER Ministry-i meranga inyaker aser anünga aliba project tema kara tenzüktsü, ta ashi.
Union minister-i ashiba agi, project kar dak sentakba nung technical timtem kar lir, aser itemji tekaraba nung bentettsü.
Senotsü dak sentakba timtem kokteta aser gari lenmangtem tekaraba nung yanglutsü dak sentakba nung Singh-i, yimtsüngtem nung gari lenmangtem kar Pradhan Mantri Gram Sadak Yojana (PMGSY) kübok inyaktsü asoshi Ministry of Road Transport & Highways nem agütsüogo, ta ashi.
Ajisüaka DoNER Ministry-i maneni item lenmang projects tekaraba nung tembanga renemtsü asoshi inyaktsü, ta Union minister-isa metetdaktsü.
Union Minister Singh-i, “Nagaland nung medical college ka amenoktsü sentong aliba atema ni Union Health Minister, J.P. Nadda den o lemtepogo aser Health Minister-i telangzüba tajung agütsüogo,” ta metetdaktsü.
Ano Zeliang-ia Singh dang International senden ka nung adentsü atema asüng pa Andhra Pradesh chief minister, N Chandrababu Naidu den Malaysia-i aotsü, ta metetdaktsü.
Zeliang-isa, Ato kilonser Narendra Modi indang Act East policy ajungkettsütsü asoshi pai tanga linüktem nungi tejaokertem den jembitsü tebilemba lir ta lemsatep.